Modi ya actor tajung saka Assam nungbo kecha mesütettsü:Gogoi

Guwahati, January 22 (Agencies): Assam Chief Minister Tarun Gogoi-i, linük Ato Kilonser Narendra Modi ya actor tajung, ajisüaka pa tsüngya agi teti tangbo tesem ajak nung takok mangutsü, ta ashi.
Congress lenir tain aser tejen, Gogoi-i, Ato Kilonseri linük nung aliba nüburtem dang Assam nung terenlok mapa kecha meinyak ta shia anisatsü meranger. Pai o mejembidang tesüiba mapang inyaker alibatem tama meyipa reprangdangtsü nüngdak,” ta ashi.
“Pai linük sorkari inyakba dak ajemdaker jembitsü tim. Modi-i pai tamakok nembangtsü atema Assam nüburtem anisatsü meranger. Pa actor tajung amai ajisüaka iba jagi teti dangbo takok mangutsü,” ta Gogoi-i ANI dang ashi.
“Onok tsükchir tulutibaji BJP lir. BJP-i loktiliba nung telemsa adokdaktsür. Parnoki takar meima sensaker sembaba dang masü saka jembiba masü dangang ka inyaker. BJP teloki lokti aser nüburtem ajungtsü asoshi mebilemer aser ibaji balakata Assam nung ataloker,” ta pai shisem.
Congress teloki BJP mesükba telok nem Assam malensepdaktsütsü aser tamangba yimsü nung ajemdaker telemsa adokdaktsüba maparen meinyakdaktsütsü, ta pai ashi.
“Rashtriya Swayamsevak Sangh (RSS) aser Bajrang Dal teloktemi tesüiba küm ka tashi ibala mesükba telemsa adokdaktsütsü merangogo ajisüaka ni itemji nokdangtetogo,” ta Gogoi-i ashi.

You must be logged in to post a comment Login