Modi ya capitalist aser corporate mongin:Tarun Gogoi

Guwahati, November 14 (Agencies) : Sen 500 aser 1000 mamshitsü lemtetba atema Centre aitsüdang Ato Kilonser Modi ji capitalist aser corporate mongin, ta taoba mapang Assam chief minister Tarun Gogoi-i ashi.
Gogoi-i, “Socialism tetettsü telok tila ka masü saka sensaker aria bilemtsüba dang ajar. Modi ji capitalist aser corporate mongin lir. Sen kanga ajema aatetba teloktema lir aser tang ya itemji tim tatemba. Osettem nung senbo tujen atur saka mapa tasenbo madoker,” ta IANS dang ashi.
“Ajaki teraksa aser black money agiendaktsüner. Küm ana ser tesadang süia aoer ajisüaka Modi-i black money meyipa bener aruba mangur. Pai tamakok nguogo. Pai anogo 100 tsüngda nung Swiss bank tem nungi sen meyipa bener arutsü nangzük. Ano pai nisung shia account nung inoktsütsü nangzükba sen lakh 15 asenoki mangur,” ta pai shisem.
Ato Kilonser-i sen 500 aser 1000 senpaktem joko magitsü ta mesangdong tsüngda opposition temi pa anemba ajanga nübur ajak dang black money bener aruba mapa nung pa den yariteptsü ajungshi.
“Party karbo item senpaktem shibangba maparen agi kanga shisa bulur. Ni anemertemji tashi aketba nisungtem lir. Ajisüaka ni parnok metsübutsü. Ni ochi lenmang metoktsütsü. Nisung karibo nü dang chitepa kecha mashir, ajisüaka na mali dangbo tangar dang na majung shia na anemdaktsür,” ta pai Ghazipur, Uttar Pradesh rally ka nung jembidang ashi.
Item senpaktem aoksa shibangba ajanga sensakertem timtemdaktsüba atema Congress aser tanga opposition party temi Ato Kilonser nem tai tongloktsüogo.
Tang linük tesem ajak nung bank aser ATM kima nüburtem sen melentsü aser agizüktsü atema mapang talanglang tarensena nokdaktepba tensa agi tonga lir.