Modi yimsüsüba ya Hitler yimsüsüba mesük: Ambekar

Mumbai, July 20 (Agencies): Mumbai Mayor aser Shiv Sena lenir Snehal Ambekar-i Ato kilonser Narendra Modi ya taoba mapang Germany nunger dictator Adolf Hitler den medemdanga jembiogo.

Afternoon Despatch & Courier den interview agiba mapang arishi küm 43 Ambekar-i la-a chief minister mesük aser la menden apir la gari nunga red-beacon aginer, ta ashi.

‘Modi’s rule is quite Hitler-esque’ omen nung ajemdaker interview agiba mapang Ambekar-i, “Pa dak dang metaloker inyakba asoshi ni Narendra Modi sapur. Aji süaka ano külenbo pai yimsüsüba ya Hitler yimsüsüba mesük,” ta ashi.

“Kodang nisung kati tashi amshidir iba ya ataloktsü,” ta tang mezüng municipal corporator, Ambekar-i ashi.

La ya yimti nung tetsür Mayor tenetbuba aser mezüng Dalit tsür mayor September 2014 küm shima liasü, aser joko mapang tatsüka la gari nung red beacon inoktsü asoshi lai lenmang bushia arudar.

Taoba mapang LIC ketdangser Ambekar-isa, tang la menden jenjang ya chief minister jenjang den kasa ama lir, ta ashi.

“Mayor asoshia rongdak mapa maneni adoker, aser lokti tenüng nung kanga tongtibang nisungtem agizüktsü asoshi aor. Chief minister red beacon ngura yimti sasep nunga mayor ka jenjangji kasa lir,” ta lai ashi.

“Mayor ka gari nung red beacon inokba nung kecha tai mali ama ni bilemer,” ta laisa shisem.