Modi’er Cabinet ulushiba nung Northeast nungia Minister shimoktsü akok

New Delhi, August 3 (Agencies): Tan August ita tetenzüklen Narendra Modi-i aniba Cabinet ulushitsü aser iba nung Northeast nungia nisung asem minister menden nung shimoktsü akok ta jembir.
Modi’er Cabinet nung Assam health minister Himanta Biswa Sarma, taoba Union minister Agatha Sangma aser Manipur chuba Leishemba Sanajaoba nungertem shimtsü akok ta osang ka ajanga ashi.
Ayodhya nung Ram Temple yanglutsü atema August 5 nü ‘bhoomi pujan’ agitsü aser iba sülen Cabinet ulushitsü akok.
RSS lennir tejen Krishna Gopal-i BJP aser Sangh tsüngda tesentaktep ayur aser taküm June ita pa den külemi BJP organisational secretary, B.L. Santosh nati Modi den ajurutepa liasü. Iba senden nung Sangh lenir Dattatreyya Hosabale aser BJP national president J.P. Nadda naprong aden.
Iba senden ya Modi’er sorkar küm ka ajungba sülen amen aser iba ajanga Cabinet ulushitsü aser nübo melenshitsü akok ta nisungtemi bilema liasü.
Rajya Sabha election nung BJP ticket amer takok anguba dang masü saka Modi’er cabinet nung Jyotiraditya Scindia dendaktsütsü ama bilemer.
Madhya Pradesh chief minister Kamal Nath den tesentaktep pilatsü atema BJP national lennir kari Jyotiraditya mesüzükdang, pa nem Union Cabinet menden agütsütsü nangzüka liasü ta osang angazüker. Ano, BJP chief minister Shivraj Singh Chauhan-ia Scindia ya state politics nungi piladaktsünür ta party züngsem kari ashi.
Tang Modi’er Cabinet nung minister 57 lir aser ibaji taoba sorkar dang nungi menden 13 agi tajemba lir. Centre sorkar nung minister 81 tashi shimtsü akok saka Modi’er sorkari ministry tila ka dang ayutsü jembia liasü.
Northeast state nungi BJP state unit temi Cabinet ulushidang Northeast nem minister menden ana lemzüktsütsü ta jembir.
Northeast nungi minister menden nung Manipur chuba Leishemba Sanajaoba shimtsü akok, ta BJP lennir kati ashi.
Tawa tu Sanajaoba-i New Delhi nung BJP lennir Amit Shah den ajurutepogo. Pa ya Meitei nunger aser ibaji Manipur nung kin tulutiba lir.
Modi ministry nungsa Assam Finance & Health minister Himanta Biswa Sarma shimoktsü akok ta jembir.
“Sarma-i mapang talangka Delhi-i aotsü atema meranger. Iba ya tang tasen masü, saka Assam nung 2021 küm assembly election agitsü lir aser nübortemi CAA anema lungkak aiterji, pa Assam nung nüngdaker” ta Assam BJP lennir katia ashi.
Sarma ya North East Democratic Alliance (NEDA) convenor lir aser Northeast nung BJP-i aniba sorkar kümtetba nung pai tongti shilem agiogo.
Northeast nungi Modi’er Cabinet nung minister inyaktsüpur rongnung taoba Union minister aser National People’s Party lennir Agatha Sangma asütsü akok ta jembir.
La ya Tura constituency nungi Lok Sabha MP aser Meghalaya chief minister Conrad K Sangma tenu lir.
Külen, Northeast atema BJP general secretary in charge, Ram Madhav mapa nungi agientsü akok.
Ram Madhav ji Sangh-i tanaben meyipa arutsü mesüra tanga mapa ka lemzüktsütsü akok ta RSS züngsem kati ashi.
Ram Madhav ya northeast nungi agientsü. Pai iba sentsü bener pa indang India Foundation nung adenertem aika northeast chief minister tem asoshi ‘advisor’ mesüra ‘political advisor’ inyaktsü shimogo. Parnok nem sorkari itasen agütsür, ta RSS züngsemisa ashi.
“Ram Madhav-i iba mapa inyakba ajanga par India Foundation ajangzükdaktsüba ya Sangh-i mepelar” ta paisa ashi.
July 31, 2020 nü Ram Madhav-i shimba advisor Priyang Pandey-i pa mapa nungi sodi agiogo. Pa ya Nagaland chief minister Neiphiu Rio indang advisor inyaka liasü.