Modi’er MA degree nung subject temji GU nung maliasü: Jayantibhai

Ahmedabad, May 12 (Agencies): Ato kilonser, Narendra Modi indang tazüngba degree kulikaket nung maneni mangatettep adoka taoba mapang Gujarat University (GU) nung political science professor inyaksang, Jayantibhai Patel-i, Ato kilonser indang degree nung aliba subject temji iba mapang nungjibo university nung magi, ta shiogo.
Narendra Modi indang Masters in Arts degree kulikaket nung tashishitsü lir ta shia Professor, Patel-i, Ato Kilonser Modi indang degree nung aliba subject temji  iba mapang nungjibo (Modi azüngdang) university indang syllabus nung maliasü, ta ashi.
“Ato kilonser Modi indang kulikakettem nung zülua aliba MA Part-2 papers nungji tashishitsü lir. Ni metetba agi, internal aser external kaketshirtem atema zülua aliba subject temji maliasü,” ta Patel-i ashi.
Patel ya Gujarat University nung 1969 küm nungi 1983 küm tashi political science professor inyaka liasü aser pai, Modi ji class-i junga marur kaketshir ka liasü, ta ashi.
Patel-i, “Modi class-i junga maru. Onok class nung onük balala nung o lemtepba aser o toktepbasa liasü, saka Modi-i kodanga shilem magi,” ta ashi.
Ajisüaka Gujarat University registrar, Dr Mahesh Patel-ibo, “Marksheet ji küm 30 tejaklen renem. Iba nungji shia aliba subject temji iba mapang nung agia liasü,” ta ashi.
Ano külen Ato kilonser, Modi indang BA degree dak sentakba nung Delhi University-ia BA degree ji shitak ta ashi ajisüak
Aam Aadmi Party (AAP)-i, Modi indang degree ji taila ta nokdaker.
Modi indang BA degree anema yashi AAP lenir, Ashutosh-i, “BJP-i sayaba Modi indang marksheet nung candidate tenüng aser marks ji print süa lir, ajisüaka 1978 küm pass asür tanga candidate tem indang kulikakettem nungbo tenüng aser marks ji teka agi dang zülua lir,” ta metetdakja liasü.