Modi’er sen agienba mapatongi film industry nem tetsüdaktsü bener marutsür: Bhatt

Mumbai, November 09 (Agencies): India Ato Kilonser, Narendra Modi-i tenzükba tang tamshidak sen 500 aser sen 1000 senpak agientsü mapatongi India nung tentetba film industry nem tetsükdaktsü bener marutsüba olen ka Film & Television Producers Guild of India nung Tir, Mukesh Bhatt-i tanü, Bodbar nü metetdaktsüogo.
“Ato Kilonser, Modi-i ozüng alema sen amshiba maparen nokdangtsü nükjidong nung sen 500 aser sen 1000 senpak joko mamshitsü mapatong tenzükbaji kanga dang junger. Ajisüaka, iba mapatongi film industry nem tetsükdak kecha bener marutsür kechiyong onoki senpak asangsang nung mamshir,” ta pai ashi.
“India nung tentetba film industry-i temelenshi tajung agia, taa sen agütsütsü aser shishilembatsüren nung senpak asangsang nung mashir. 2000 küm nungi tenzüka, onoki shishilembatsü aser taa sen agütsütsü maparen ajunga cheque, demand draft, internet banking aser iba amala teka nung sen mamshi senotsü agütsüteper,” ta pai osang jangjashitsü.
India nung ozüng alema sen amshiba aser kiralongrartemi iba amala sen amshia, par tongpang nung amshitsü osettsüset alizüktsü maparen nokdangtsü nükjidong nung Modi aser pai aniba India sorkari India ajunga nung tang tamshidak sen 500 aser sen 1000 senpak joko mamshi, sen 500 senpak tasen aser tan asensa, sen 2000 senpak menünga amshitsü renemba osang ka yasüng, Mongolbar aonung sangdongogo.