Modi’er sorkar küm 2 ajungba nüngtem nung sentong 200 ayongzüka akatsü

New Delhi, May 16 (Agencies): Narendra Modi’er sorkar küm ana ajungba nüngtem nung sorkar küm ana ajungba anogo, May 26 nungi tenzüka hopta ana piyong sentong 200 dak tema  ayongzüka akatsü, aser iba mapang party MP aser MLA temi sorkari inyaktetba mapatem nüburtem nem metetdaktsütsü.
BJP osang ka ajanga, MP aser MLA tem dak alia office ketdangpurtemia item sentong nung shilem agitsü. Sentong 200 rongnung lokti senden, shisashirtem senden, osangbenertem senden aser sorkari benokba scheme tem nungi tajangzük angurtem den o lemtepba senden densema lir.
Osangbenertem den jembidang BJP media department tekolak, Shrikant Sharma-i, item sentongtem ya sensakertem aser tepetzük tia nung alirtem ajungkettsü atema sorkari mera agia inyakba sangdongtsü atema lir, ta ashi.
Ato kilonser Narendra Modi-i party MLA tem dang sorkari benokba mapatong balala nüburtem nem metetdaktsüba nung mapang timba intoktsüla ta tuyuogo, ta osang angazüker.
Iba dak alia Lok Sabha MP ajak dang pei pei constituency nung anogo ka piyong alitsüla aser MLA temi pei pei constituency nung anogo tenet amungtsüla ta tuyuogo, ta Sharma-i ashi.
Item sentong renemba dak sentakba nung BJP-i party nung otongdartem senden ka ayongzüka akatsü aser iba senden nung taoba mapang BJP Tir ana aser Union minister tem tang teinyakdak- Rajnath Singh aser Nitin Gadkari nati jembitsü.
Social media ajanga shilem tulu agitsü aser May 22, 2016 nü party-i IT volunteers atema terenemshiba sentong ka katsütsü, ta paisa ashi.