Modi’er sorkar küm 3buba nung project aika tenzüktsü: Jaitley

New Delhi, May 29 (Agencies): Deobarnü Union Finance Minister, Arun Jaitley-i, Ato kilonser Narendra Modi-i aniba NDA sorkar yimsüsüba küm asembuba nung India nung project tasen aika tenzüktsü, ta metetdaktsü.
“Sorkar ajak atema kümsük tom nung ang tarutsü atema tali tashi itshir. Modi sorkar atemaa mezüngbuba küm anaji tera anü-anür liasü,” ta Union Minister Jaitley-isa ashi.
Taoba sorkar inyakyim mejungi liasü ta aija Union minister-i, “Ato kilonser, Modi aser par teloki India nung yimtenren nung temelenshi aser yimsüsüba sobaliba temelenshi ka agütsüogo. India nung Centre sorkar temerük alitsü atema inyakogo,” ta ashi.
Jaitley-i ashiba agi, “Sorkar yimsüsüba kümsembuba nung sorkari linük terenlok, yimtsüngtem aser social sector nung rangloker inyaktsü, aser taküm küm yimtsüngtem nung gari lenmang yangluba nung intokba senji mezüng intokba dang nungi asemben agi timba asütsü.”
Paisa, “Regional airport 25 inoksemtsü. Railways tashi itshidar. Tongtibang railways station 400 yanglushiba ajanga Indian Railways tajungba akumtsü. India-i nüngdakba dang nungi tali power angutsü. Sen tali intokba ajanga Port capacity tashi itshidar. Totzü aser gas nung temelenshi atema inyakyim benokogo,” ta metetaktsü.