Modi’er sorkari ‘Brahmanism’ ajungkettsür: Arundhati Roy

Pune, Nov. 28 (Agencies): Honibar nü kaketzülur nüngtugu, Arundhati Roy-i Narendra Modi’er sorkari ‘Hindu Rashtravad’ tenüng nung ‘Brahmanism ajungkettsür’ aser tang linük nung minority tem ‘tetsübu’ tensa nung aliba atema “akhümtsübutep maliba’ ta asüba olong jagi teperi masü, ta ashi.
Tanü Pune nung sentong ka nung Roy nem loktiliba nung temelenshi atema inyaker, Mahatma Jyotiba Phule nüngtem nung tentetba award ka agüja liasü, aser la iba tesem nungji aliba meteta BJP student wing, Akhil Bharatiya Vidyarthi Parishad (ABVP) iba tesem nungji adenshia lungkak ait.
Roy-i Mahatma Phule Equality award agizükba sülen lai, tang linük nung minority tem ‘tetsübu’ tensa nung aliba atema “akhümtsübutep maliba’ olong jagi teperi masü, ta ashi.
Modi’er sorkar aija lai, sorkari ‘Hindu Rashtravad’ tenüng nung ‘Brahmanism ajungkettsür, ta ashi.
Booker Prize angur, Roy-isa, linük nung loktiliba nung temelenshi bener arutsürtem sentsüwangshidaktsütsü meranga BJP-i parnok dang “great Hindus” ta ajar, ta ashi.
Lai jembiba o ashishia right-wing züngsemtemi lungkak aita, la ya “linük-anemer ka, Pakistan pusemer ka, India mitkar anemer ka,” ta yimyim ayimdang police-i parnok lungbanga liasü.
Iba sentong nung NCP lenir aser taoba mapang Maharashtra minister, Chhagan Bhujbal-ia, BJP-i Bihar Assembly election osang nungi tangazükba akatsüla aser Ato kilonser Modi-i party nung o mekümdangi jembirtem azüoktsüla, ta ashi.