Modi’er sorkari CBI aser tanga agency tem tim mesüi amshir

Bhopal, August 6 (Agencies): Narendra Modi-i aniba sorkari parnok den toktepertem anema CBI aser tanga agency-tem tim mesüi amshir, ta Congress lennir Abhishek Manu Singhvi-i Deobarnü ashi.
“Politics tasen ka asayar. Ajisüaka, iba politics tasenji mebilemdangba, tsükchitep, mang ayangba aser maremzükba indang lir. Iba inyakyim ya tesüiba küm asem kanga tongti süa inyaka arur. Iba inyakyim ajanga democracy nung lendong bener arutsütsü” ta Singhvi-i ashi.
“Prime Minister Narendra Modi-i aniba NDA sorkari CBI aser tanga agency-temi mesüi amshir. RJD tanishir Lalu Prasad Yadav, West Bengal Chief Minister Mamata Banerjee aser Karnataka Energy Minister DK Shivakumar nunger dak tenük yoka mapa inyakdaktsür. Iba ya democracy anema aser kanga dang tim masü lir. Ajisüaka, iba inyakyim ajanga Congress temulung meilatsü” ta paisa shisem.
“Agency temi Opposition anema mapa inyaker, ajisüaka parnoki kechiba BJP lennirtembo bushisüngdang masür. BJP lennirtembo ajak ochishir dang aser Opposition nungbo ochimashir dang ali asü?” ta Singhvi-isa asüngdang.
BJP-i ‘Congress-Mukt Bharat’ yimyim ayimokbaji democracy anema lir aser BJP-i parnok den toktepertem agientsü atema opposition dak tenük yoka mapa inyaker, ta paisa aitsü.
“Iba inyakyim ya democracy atema kanga majung. Mang ayangtsü atema politics inyakba ni aitsür. Linük nung nübortemi iba inyakyim tamajung anema longjemer raratsüla” ta Singhvi-isa ayongzük.