Modi’er sorkari Northeast melenshitsüogo

Imphal, June 6 (Agencies): Modi’er sorkari kanga dang takok ngua Northeast nung temelenshi bener aruogo, ta Mongulbarnü Union minister Jitendra Singh-i ashi.
Küm aika Northeast senzüka toktsüba, Modi’er sorkari küm asem tsüngda terenlok bener arutsüogo, ta paisa ashi.
Imphal nung Narendra Modi’er sorkari küm asem tsüngda inyaktetba mapatem metetdaktsütsü atema sentong ka nung o jembidang Jitendra-i “Northeast tesem renlokdaktsütsü atema sentongtem atonga kanga dang meranga inyaka arur.
India kübok tanüngba tesemtem den jenjang kasa kümdaktsütsü atema sorkari Northeast dak temulung agüja mapa inyaker” ta Jitendra-i metetdaktsü.
Northeast state 8 temi tanü pei pei state nung terenlok lir aser tanga state tem ama tejakleni aoer ta shitettsü, ta Minister of State for the Development of the North Eastern Region (DoNER)-isa shisem.
NDA sorkari Northeast nung temulung agütsübaji asenoki meyipa reprangdangra, tesüiba küm asem tsüngda Prime Minister-i 10 ben dak tali Northeast semdangogo aser ano pai May 26 nü sorkar küm asem ajungba anogomung Guwahati nung arua amungtsü lemtet, ta Jitendra-isa metetdaktsü.
Senotsü lemzükba tsütsü reprangra, tesüiba küm asem tsüngda Northeast nung shilem 25 agi teimba senotsü lemzükogo. Gari lenmang yanglutsü atema sen crore 40,000 dak tema lemzükja lir. ‘Northeast Road Development Scheme’ ta ser special road corporation ka tentettogo aser iba telok ajanga northeast nung gari lenmangtem anepalutsü, ta paisa ashi.