Modi’er sorkari NSCN(IM) den yimjung tenangzüktep agiogo

August 03, 2015 anogo nung New Delhi nung India sorkar o NSCN-IM na tsüngda Naga yimten ken o latettsü asoshi tangatettep ken o kar renemba sülen Prime Minister, Shri Narendra Modi aser NSCN-IM tongti zülur Muivah na den telok agiba noksa ka yangi angur. Iba noksa nung Union Home Minister, Shri Rajnath Singh aser India tenüng nung NSCN-IM den jembir Ravi na noksa nung angur.

New Delhi, August 3 (Agencies) : Hombarnü Centre sorkar aser Nationalist Socialist Council of Nagalim (NSCN) I-M na tsüngda yimjung tenangzüktep ka agiogo aser iba ya ajanga küm aika Nagaland aser temeket aliba aliba state-tem nung telungpur maparen anentsü akok.
Prime Minister Narendra Modi matsüngdang NSCN (I-M) general secretary Thuingaleng Muivah aser peace talks interlocutor R N Ravi nati tenangzüktep nung sign asü saka iba nung aliba onüktem ano yimjak nung memetetdaktsüi lir.
Iba tenangzükba ya 7, Race Course Road nung Prime Minister Modi’er kidang agi aser iba mapang NSCN I-M tongti tezülur Muivah den lennirtem den Home Minister Rajnath Singh, National Security Advisor Ajit K Doval aser Army chief General Dalbir Singh nungertem liasü.
Küm aika NSCN (I-M)-i Nagalim mesüra Greater Nagaland tentettsü takhangba agüja arur. Greater Nagaland kübok Manipur nung Naga nunger timba ser aliba Ukhrul, Tamenglong, Senapati aser Chandel district tem, Assam nung Karbi Anglong, North Cachar Hills, Golaghat, Sibsagar, Nagaon, Jorhat, Dibrugarh aser Tinsukia, Arunachal Pradesh nung Dibang Valley, Lohit, Tirap aser Changlang aser Myanmar nung Kachin state aser Sagaing division nungertem densema lir.
Iba tenangzüktep nung aliba onüktem temai adoka memetetdaktsüba agi, northeast nung tanga state sorkar temi telangzüba kecha magütsü.
“Tanü asenoki khuret ka koktetba dang masü saka tarutsü tasen ka atema tenzükogo. Zübo tejentem anepdaktsüba aser khurettem koktetba dang masü saka nenok akhüm aser jenjang meyipa bener arutsüba mapa nung onoki yariteptsü” ta Prime Minister Modi-i ashi.
“Nagaland nung lennirtem aser nübortem dang tanü ni ya ashir, Nenoki Nagaland atema tarutsü tajung ka yangerba dang masü saka nenok sempet, sobaliba aser mapa ajanga linük tashitaitba kümdaktsütsü aser azükarudaktsütsü. Linük anüdoklen atema nem nenok tanükertem lir aser iba sülen aliba alima asoshi kishi lir. Naga nunger akhüm, maongka aser azükarutsü atema inyakba nung linük tanüngbai yariteptsü” ta Modi-isa metetdaktsü.
Muivah-ia ashiba ashi sorkar aser Naga nunger tsüngda tesentaktep tasen ka tenzüker saka tang nungi tenzüker tayongzükba tulutem ajurutsü.