Modi’er sorkari parnok onük benoktsü meranger: Sonia

Buxar, October 17 (Agencies): Ato kiloser Narendra Modi’er sorkari parnok onüktem nübur matsüngdang benoktsü meranger ta aija tanü Congress Tir, Sonia Gandhi-i, parnok yimsüsüba kübok tamangba lokti tsüngda mangatettep adoktsüsa inyaker, olulu nung ajemdaker tai maket nisungtem tepseter aser shisashir tem anema inyaker, aser ibaji ajanga linük democracy aser loktiliba amokmerener, ta ashi.
Ato kilonser Narendra Modi-i Congress yimsüsüba küm 60 indang maneni aitsüba dak sentakba nung tanü Buxar nung election nüboyim sentong ka nung jembidang Sonia-i, lar party-i democracy tashi itdaktsüba ajanga Modi Ato kilonser akümtsü mela, ta ashi.
“Democratic tangatetba nungi BJP sorkar piladar. Parnoki par onüktem nüburtem matsüngdang benokba ajanga asen democracy amokmerener. Tamangba lokti tsüngda tensa mejungi akumer,” ta lai ashi.
Tawa Dadri nung Muslim nunger ka tepsetba aser nüngtugu kaketzülur ka tepsetba tatalokbatem nung ajemdaker Sonia-i, “Olulu nung ajemdaker tai maket nisungtem tepseter. Shisashirtem amakbaji parnok tebilemba sadoka mejembidaktsütsü atema lir. Parnoki tamangba lokti tsüngda tesünep aliba raksatsütsü meranger. Iba ya tejashitsü ka kija masü saka maksütsüka lir,” ta ashi.
Gandhi-isa Modi-i yimjak nung aluyimertem, tetsürtem aser lanurtem dang tenangzükba balala meinyaktsütetba atema aitsüogo.
Laisa, aonsotsü densema nüngdakba osettsüset balala nung jenjang atuba atema Ato kilonser aitsüogo.
Modi-i tanen makai “Tesüiba küm 60 tsüngda Congress-i kechi inyaktet, Congress-i kecha meinyaktet,” ta jembia aruogo, ta Sonia-i ashi.
“Ni iba ya, talisa lanurtem dang shiner, mapang ka nung colonial yimsüsüba aliba ajanga linük nung kecha anüngzüka maliasü. Tesüiba küm 60 nung Congress party lenisüba nung shisaliok, anema-alibaren, aluyimba, industry, nuclear densema aisü nung asentenshi kaogo,” ta Sonia-i ashi.
“Party-i linük terenlok lenmang nung aniogo aser loktiliba nung tesünep atema lenirtem tenlaogo,” ta laisa ashi.
“Onoki democracy tashi ita kümdaktsü, aser ibaji ajanga tanü Modi Ato kilonser kümtet. Item ajunga ya tesüiba küm ka ser tesadang ka nung ajangzüktet asü (?) Congress-i terenlok bener arutsübaji nai mereprangtetra, ibaji shiba tai. Na tai,” ta lai ashi.
October 28 nü Bihar assembly election tasembubaren nung menden 50 atema vote agütsütsü lia Sonia-i nüboyima jembiogo.