Modi’er sorkari tema tazütsü dak alaka kecha meinyak: Sonia

Patna, August 30 (Agencies): Tanü Bihar yimtiba Patna nung Congress Tir, Sonia Gandhi densema opposition nung tongti lenirtemi, Narendra Modi’er sorkari MGNREGA ama tongtibang scheme tem nung senotsü ajemtsüogo aser tema tazütsü ka dak alaka par sorkari kecha meinyak, ta aitsüogo.
JD(U), RJD, SP aser Congress-i Patna nung ayongzükba ‘Swabhiman Rally’ nung jembidang Sonia Gandhi-i, “Modi’er sorkar mapang shilem pezü nungi kabo süiogo. Tang tashi nung parnoki inyaktetbaji tema tazütsü ka dang. Parnoki kecha meinyak. Ibaji kü dang nungibo nenoki tajungba meteta lir,” ta ashi.
BJP-i aniba sorkari nisung crore ka nem mapa agütsütsü ta nangzüka lir saka parnoki tamakok anguba dang masü saka sorkar mapa nung maongka magütsüba den MGNREGA ama tongtibang scheme tem nung senotsü ajemtsüogo, ta Congress tongti lenir Sonia-i ashi.
Modi-i DNA indang jembiba dak sentakba nung Gandhi-i, Ato kilonseri Bihar tenüng menüktsüogo aser state nübur dang tatishitsü tamajung sayuogo, ta ashi.
“Nisung kari Bihar atalatsüba nung jangratem angur. Koba mapang nungsa maongka ngudir parnoki (Bihar indang) DNA aser sobaliba indang jembir. Parnokisa BIMARU state ta aija jembir,” ta lai ashi.
Land Bill dak sentakba nung Gandhi-i, iba ordinance asoshi Modi-i nübur tem masüngdang apudaktsüsa akum, ta ashi.
“Iba sorkar ya aluyimertem anemba sorkar lir. Parnoki aluyimertem ali rakzüker parnok takar tembar nem lemtsüner. Onoki Parliament nung aluyimertem temeten asoshi raraogo aser tesüsabo sorkari apudaktsüsa akum,” ta Sonia-i ashi.
Tanü iba sentong nung Bihar chief minister Nitish Kumar, RJD tongti lenir Lalu Prasad, JD(U) tongti lenir Sharad Yadav aser SP lenir Shivpal Yadav nunger densema JD(U), RJD, SP aser Congress nung inyakertem nisung merirjang aika dena liasü.