Modi’er sorkarji RSS-i anishir: BSP tongti Mayawati

Lucknow, September 06 (Agencies): Tanü BSP tongti lenir Mayawati-i, Narendra Modi’er sorkarji Rashtriya Swayamsevak Sangh (RSS)-i anishir, ta aitsüogo.
Tanü Lucknow nung sangdong ka ajanga lai, “Modi’er sorkari RSS matsüngdang apudakogo. Tawa Modi-i RSS den senden amenba ajanga sorkar indang ‘remote control’ ji communal aser fascist tentet (RSS) ket nung lir ta sayur,” ta ashi.
BSP leniri iba o jembiba ya, tan hopta Ato kilonser Narendra Modi aser par minister tem RSS den senden mena internal security, Maoists telungpur tebilemtsü aser Jammu & Kashmir tensa onüktem, jembiba dak sentakba nung jembiba lir.
Union Minister temi parnok ministry report RSS nem agütsüba aija Mayawati-i, nüburtemi shimtetba sorkar kati communal, fascist aser lokti nung tesempa proker RSS matsüngdang masü saka linük Temzüng tsüngdang aser nüburtem matsüngdang apudaktsüla,” ta ashi.
“Tamalen BJP-i taoba sorkarji remote control ajanga anishir ta tai tongloktsü, ajisüaka tawa tatalokbatem ajanga Modi’er sorkar headquarter ji Nagpur nung aliba RSS office nung lir ta sayur. Iba ya democracy atema temaitsü tamajung ka lir,” ta lai ashi.
Modi’er sorkari lenla ajunga nung tamakok nguogo ta aija Mayawati-i, RSS-i tamakokji mereprangtetba aser temelung asübaji mamangtettsüka, ta ashi.
“Sangh Pariwar aser parnok tentettemi tesempa proktsü atema sadema toktsür saka tangatetba nung jembirtembo temerenshi agütsür,” ta lai ashi.
One Rank One Pension (OROP) dak sentakba nung Mayawati-i, Centre telemtetba jagi temelung masü, kechiyong parnoki anisüngzüker alir army tem tongtibang takhangba aika magizük, aser ibaji ajanga lungkak aiter, ta ashi.
“Centre-i OROP nungbo korua meinyaktsüla,” ta lai ashi.
Mayawati-isa, Ato kilonseri o tululu jembiba ajanga linük meyaritsü, kechiyong par minister temi pa melungba anema inyaker, ta ashi.