Mogadishu Police HQ amak; 5 tepset, 13 shi yiru

Mogadishu, May 09 (Agencies): Somalia yimtiba, Mogadishu anüdoklen tentetba traffic police tesepti nung pokshiba lendong atalokdaktsüba den külemi, prangpong injang kalokja amakba lendong atalokdaktsüba osang ka police-i tanü, Hombar nü metetdaktsüogo.
“Tan lendong nung ishiba agi nisung 5 asüba aser nisung 13 shi yiruba osang tang tashi nung jangjaogo,” ta police aser mozü ketdangsertemi metetdaktsü.
Tanü lendongji par teloki atalokdaktsü ta shia, Al-Shabab telungpur teloki tanü lendong atalokdaktsüba atema tenüng agia metetdaktsüogo.
Tenük kuli alirtemi ashiba agi, Shangani district nung tentetba traffic police tesepti nung pokshiba lendong tesashi ka atalokba sülen amakertemi injang kalokja amaktsü tenzük.
“Peisasa pokseta asütsü mulungteter kati pokshitsü oset alenokba car gari ka anir arua kasaji pokdakja lendong atalokdaktsüba sülen tanü amakertemi police tesepti telungi ia police ketdangsertem amaktsü tenzük. Ajisüaka, police ketdangsertemi tanü amaker ajunga tepsetogo,” ta police-isa metetdaktsü.
Tanü lendong nung asür rong nung police ketdangsertema parnok 3 tashi densemba osang jangjaogo.