Mohammad Azharuddin-i HCA Tir atema züluba shidi magi

Hyderabad, January 14 (Agencies) : Mohammad Azharuddin-i Hyderabad Cricket Association (HCA) Tir asütsü atema züluba shidi magizük. Pai tamalen nungi iba mapa atema tokteptsü ta shia liasü, ajisüaka pa agizüktsü asü magizüktsüar ta tasüngdangba aika liasü.
Azharuddin-i, “Kü shidi magizükba atema ni jashia bilemer. Ni okadaki ken o ajak nungi meshitettsüogo,” ta ashi.
2000 küm match fixing mapa inyakogo ta aitsüba sülen Mohammad Azharuddin ya cricket dak sendakba mapang kecha nunga taküm piyong shilem magidaktsüi nokdanga liasü. Pa nokdanga aliba agienogo ta sayutsü asoshi pai BCCI nungi telangzüba ka nüngdaker.
Tesüiba mapang HCA Tir Arshad Ayub-i ashiba agi, nia state association temzüng kübok Tir menden atema tokteptsü temsüa mali, ta ashi.
“Hao, Azhar-i returning officer nem shidi agütsüogo, ajisüaka pa taküm piyong cricket nungi nokdangba agienogo ta BCCI nungi HCA dangi osang kecha maru,” ta Azharuddin-i Tir atema tokteptsü shidi agütsüba sülen Ayub-i ashi.
“Pa züluba shidi agizüktsü asoshi BCCI nungi kuli nüngdaker amai nibo bilemer. Ano HCA Tir ka asütsü atema tajemba agi executive council züngsem ka ama mongpu ka aser office-bearer ka ama ano mongpu kabosa inyaktsü temzüng nung lir,” ta ashi.
“Azhar-i item mapa khen tanga meinyakdang anungji pa Tir menden asoshi temsüa mali,” ta January 2 aser 3 anogotem nung Supreme Court-i tuyuba ama HCA Tir menden nungi anensang Ayub-i ashi.