Mohammed Sanaullah posema kuliser 3-i onük ka benok

Guwahati, June 3 (Agencies): Ex-Serviceman aser Kargil war veteran Mohammed Sanaullah bendanger ka züngoktsüsa Assam border police inquiry officer kati signatures tim mesüi amshi ta tai tonglokja nisung asemi ken o ka benokogo.
Border police ya Assam nung dang balaka tenteta lir aser parnoki ozüng alema arurtem mesüra bendangertem jangjar, apur aser meyipa yoker. 1962 küm Pakistan nungi ozüng alema arurtem noktangtsü atema Assam State police force nung Border police ya kongsang ka ama lapoka liasü.
Boko jila nung alir Md. Kurban Ali, Md. Sobhan Ali aser Ajmal Ali nungertemi Deobarnü sub-inspector Chandramal Das anema ken o ji benok.
Das ya tangbo mapa nungi anisüngzükogo aser 2008 küm pa border police inquiry officer ama Sanaullah anema bushisüngdang asü. Iba mapang pai nisung asem indang otsütem benden ta ashir.
Sanaullah anema benokba ken o 1978/16 nung pa tenüng tetshia lir saka pai kodang shinga dena osang melemsatep mesüra sign magütsü ta Kubran Ali-i ashir. Pa ya Sanaullah’er yimer lir.
Sanaullah-i 2017 küm Army nung Honorary Captain ka ama sodi agiba sülen border police nung sub-inspector ka ama shimok.
Ajisüaka, May 23 nü Foreigners’ Tribunal (FT)-i pa bendanger ka ta sangdongba sülen May 29 nü pa mapa nungi anentsü aser Goalpara detention camp nung yua lir.
Kuliser asem aser Sanaullah’er kinungertemi ashiba agi border police-i bendanger metettsü meranger ta ser mapa inyakba nung telok tilatem nungi chichiba India sensotem dak tenük yoka mapa inyaker.