Mohan Bagan-i goal 4-2 agi Salgaocar akok

Barasat, January 16 (Agencies): Defending champions, Mohun Bagan teloki goal 4-2 agi Salgaocar telok madak takok ngua tang tasayadak I-League asayamong tanabuba round tanü Honibar nü asayaogo.
Tanü asaya nung skipper Katsumi Yusa-i Dhanachandra Singh-i asayadak temalen nungi onloktsüba ball tekolaki tongokja par Bagan telok asoshi mezüngbuba goal minute 9 buba nung agütsü.
Tesülen, Cornell Glen, Luciano Sabrosa aser Balwant Singh nungeri asaya tenzüker minute 28, 33 aser 48 buba nung goal kaka agüja par Bagan telok nem tanü takokba bener arutsü.
Bagan teloki par taruba asaya East Bengal telok den asayatsü lemzüka lir.
Daryl Duffy-i minute 29 buba aser Gurjinder Kumar-i minute 86 buba nung goal kaka agüja tenati par Salgaocar telok jenjang tajungba kümdaktsü saka par teloki tanüngba goal 2 meyiptsüteti tanü tamakok angu.
Bagan teloki tan asayamong nung tan agi asaya tanabuba koka ajak agi points 6 ngua kasa points anguba Bengaluru FC telok  ajangteta tan asayamong nung temaba jenjang nung alir telok tarensen nung mezüngbuba telok kümogo.
Bengaluru telok den sako points nguaka, Bagan teloki goal timba agüja temaba jenjang anguba yong Bengaluru teloki tanabuba jenjang ang angutsüsa jenjang ajuru.