Mohanlal indang film ‘Neerali’ Aami 14 nü sayatsü

Metsüremi 22, 2018 (Agencies): Malayalam superstar Mohanlal indang taruba film ‘Neerali’ Aami (June) 14 nü sayatsü atema jangjaogo. Ajaki kanga dang yongya ataba Mohanlal indang ‘Odiyan’ film yangluba tatemleni arudar aser taküm pa indang film tem rongnung Neerali ya mezüng sayatsü.
Neerali film nung ‘action aser adventure’ agi sünga lir ta Mohanlal-i shiogo. Director Ajoy Varma-i anir cast aser crew temi iba film ya anogo 40 dang nungi tajemba agia tangoka renemogo. Iba film ya Mumbai aser Pune na nung timba tangoka lir.
Neerali film ya Mohanlal sapurtem asoshi kanga tajung kechiyong mapang talangka lir külen actor Mohanlal-i iba film atema ken ka tentsüa lir. “Neerali film atema recording asüba mapang!!! Laalettan (Mohanlal)-i küm pungo sülen ken ka tentsüogo. Mohanlal film nung music mejemtsüba yak kü atema maongka lir aser pai Sherya Ghoshal den ken ka atentsü,” ta ken mejemer Stephen Devassy-i Facebook nung zülutsü.
Director Ajoy indang mezüngbuba project nung shilem agitsü atema Mohanlal den külemi actor tajungtem anidenogo. Iba film nung tongti shilem agir rongnung actor Parvathi Nair, Suraj Venjaramoodu, Saikumar aser Prakash Raj nunger densema lir. Osang ajangasa ashiba agi, iba film nung tongtibang shilem agitsü atema Meera Jasmine dena shimogo. Item osang ya shidak süra, mapang talangka sülen Meera-i iba amala film tulu ka nung tang mezüng shilem agiba angutsü. 2016 küm sayaba film ’10 Kalpanakal, film nung Meera-i tatemsa shilem agia liasü.
Ajoy-isa pa indang mezüngbuba film atema Bollywood nungi technicians tem anidenogo aser film otsü ya Saju Thomas-i zülutsüogo. Iba project atema Moonshot Entertainment kübok Santhosh T Kuruvilla-i senotsü tsütsü teyari agütsüogo aser nüngtugu cinematographer Santosh Thundiyil-i iba action thriller film tangoktsüogo. Bollywood stunt choreographer Sunil Rodriguez-ia iba project atema pa shilem inyatsüogo.