Mohun Bagan-i 14 buba Fed Cup agizüker

Guwahati, May 21 (Agencies): India striker, Jeje Lelpekhlua-i goal 2 agütsüba densema, par Mohun Bagan teloki goal 5-0 agi Aizawl telok madak final asaya koka Federation Cup football asayamong takok marok tanü, Honibar nü agizükogo.
Bagan teloki tan agi Federation Cup takok marok 14 buba agizüker lir.
Jeje-i tanü asaya tenzüker minute 73 aser 88 buba na nung goal 2 agütsüba den külemi, külem asayar, Sony Norde, Dhanachandra Singh aser Bikramjit Singh nungeria minute 48, 58 aser 82 buba nung goal kaka agüja par Bagan teloki tanü final asayaji akok.
Tan takok anguba sülen Bagan teloki AFC Cup football asayamong nung shilem agitsü jenjang nguogo.
Tan mezüngsüa Federation Cup asayamong nung shilem agir, Aizawl teloki I-League champions, Bengaluru FC aser Sporting Club de Goa telok madak takok ngua final asayatsü jenjang angu saka par teloki tanü tamakok angutsüsa jenjang tamajung ajurua liasü.