‘Moitree’- Temba akhangshiba benjong among

Dimapur, September 09 (TYO) : September 8, 2016 nü Amguri Tea Estate Playground nung Mokokchung (Nagaland) aser Sivasagar (Assam) na tsüngda temba akhangshitepba ‘Moitree’ benjong among. Iba sentong ya Assam sorkar tenüng nung Sivasagar district administration-i ayonga among.
Iba benjong ya district administration anaprongi mulungtepa telungjem, yimjung, temba akhangshitsü aser district ana tsüngda sobaliba angateta libalirotsü nükjidong nung among.
Iba sentong nung adentsü atema Mokokchung Deputy Commissioner, Susil Kumar Patel den Superintendent of Police Mokokchung, Aotemsu, Addl. Deputy Commissioner Tuli, Sentiwapang aser sorkar ketdangser kar dena alu aser Assam nungi Deputy Commissioner Sivasagar, Narayan Konwar, Superintendent of Police, Subudh Sonowal aser ketdangser kar aden.
Sentong nung ken aser tsüngsang ajanga shilem agi. Tebur aser tetsür temi sobaliba asaya, Arr atsütep nung shilem agi aser friendly football match ka asayaa liasü.
Iba sentong Amguri nungi MLA, Pardip Hazarika-i moaja tenzük. Iba sentong mesükba ya ano tarutsü mapangtem nunga maneni akaba ajanga Assam aser Nagaland na tsüngda tamang aser tesentaktep tali tashi aitsü ta o jembirtem ajaki shisem.
Mangatettep tilatem ajak adianu aser aianu tajung ama tai toktepa aliba ajanga yimjung tali tashi aittsü, ta lenirtemi o jembidang ashi.