Mojingi mapa inyaker asü ?

~ M. Lepzüng Ao, Bayavu, Kohima.

Revival ken ka nung Tsüngremi mapa inyaker ta atener. Yamaji mojinga kanga mazüngi inyaker. Tsüngrem tenzüker M. Mereni züluba “Waro orr tempang koshir” Tir Yimyim nung adokbato shitak ta züngogo. Taoba mapang Aoli Baptist lennirtemi shisa kaa aser akanga nokdakba ajanga Ao lima nungbo Roman Catholic tera meyangdaktsüi nokdangtet. Tanü asen tendak Hindu yimsü shibelenertem asen kishizüng tongogo. Alima tashi aser rongsen tulu amer inyaker asünungji tanü asenok atema lendong tulu lir ta metetdi.
Tsüngremi Aor dak sakloka America nungi Dr. Clerk yoker Impur nung Baptist Mission amenlok aser Khristan yimsü den education sayuba ajanga asen Aorji Khristan yimsü aser education nung samanir kin ta jatettsüsa Tsüngremi ajungket. Saka mojingji kanga tekülak asünung Nagalima nung Khristan anemtsü aser Hindu yimsü amenoktsü asoshi asen Aor amshir südi ta belemer.
Kechiba süra Aor Khristan yimsüsür kati Hindu nunger temang arongba mitsü Delhi nungi meshir arua temeshi Naga lima ayongtem nung Hindu külemkeja süa indokba ajanga Naga nunger Khristantem kanga aoksadaktsü. Ano Nagaland nunga temalen Hindu nunger Khristan kümer alir tsümartem tanaben Hindu kümdaktsütsü mesüzüker ta jembiba ya shitak asü? Lennir M. Mereni ashiba amato Khristan yimsü ya teyazü, RSS ya-ang shitak ta Naga nunger kanga tongtipang nisung kati ashibaji shir? Khristan lima nung Hindu yimsü inokba anema Naga nunger arogotem aser tashitemeteter jenti obang ka sür Hindu yimsü shibelener anema sashia ayimtenba mapang ka nung Aor katibo Aor ka pusema aser Hindu yimsü metenja zülu ta angazüker. Ano Nagaland nung Theological College tulutiba CTC Aolijen nung Principali Hindu nunger tsüngrem otsü kaket ka saya ta asuba yagi kechi sayur?
Temalen züluri ashiba ama asen Ao lima nungbo mezüngpur tamangertem atema amokmeren kar dak alaka rishikangshi maliasü, saka Hindu yimsüi asen lima amokpangra India lima nung Khristantem rishikangshiba amaji asen lima nung asenok Khristantem rishikangshi asütsü aser Khristan state ya Hindu State akümtsü. Anungji talisa asenok Aor Khristantem kanga kümdanga mita lidi ta ayongzüker.