Mokdang takok ngua agiogo: CCNTHCO

Kohima, Tsüklai (Feb) 01 (TYO): Lenirtem tsüngda tangatetba balala liaka mokdang ayongzükba ajanga Naga nunger ajungmesoogo, ta tanü CCNTHCO Convenor, Theja Therieh aser Secretary, Joshua Newmai nati sangdong ka nung metetdaktsü.
“Chumukedima densema Dimapur district kanga azüngmeyaka liasü, yamaji Mokokchung, Zunheboto, Meluri, Peren aser Tseminyu jilatema azüngmeyaka liasü. Mokdang anemba tesemtem nunga nüburtemi yimya balala ajanga ‘election masü solution’ nungitogo,” ta parnokisa metetdaktsü.
“Wokha jila nung gari ishika dang senzü. Kohima jila nunga nisung aika pei kidang nungi mayazük. Phek nung dokan ajak shibang aser tesem balala nung Naga yimtenren onük latettsü atema sarasadema lumia among. Tang mezüng state nung mokdang alitsü atema volunteers melemzüktsü, ajisüaka senso tajungtemi mokdang among. Social media nung Naga nunger kati yamai lemsatep ‘Volunteers melemzüktsüba mokdang ka takok ngua agitetogo'” ta sangdong ajanga metetdaktsü.
“Nüburtemi telangzüba agutsübaji jangjangja nguogo, anungji yimtenren party temi nüburtem telangzübaji shisadangtsüla. Aenjeti (Jan) 29 nü Declaration alema inyakra ibajibo tashioktsüba den kasa asütsü,” ta CCNTHCO-i metetdaktsü.
“Naga nunger kibong nung Yihuda Iscariot malitsü ta CCNTHCO-i tamang akar. Election nung tokteptsü atema tenüng agutsütsü asoshi nokdakertem indang yimtenren party-i iba khuretji mabentsü, saka maongka bushisang indang tribe tenüng menüktsür asütsü,” ta parnokisa metetdaktsü.
Tribal hohos aser lokti tentettem nungi Tir aser office ketdangpur ajak dang Tsüklai 3 nü anüngdang 11:00 ako nungi Hotel Japfu nung ayongzüka aliba senden nung adentsü metetdaktsür, ta CCNTHCO-isa metetdaktsüogo.