Mokdangba kübok NBSE tatidang maiter ; Kaketshir meyirjang 55 temai tatidang agütsütsü

Kohima, February 13 (TYO) : Kaketshir telok aser ano kin balala nungi teloktemi mepishiba agizüka, Nagaland Tribes Action Committee (NTAC) Kohima aser Joint Coordination Committee (JCC) nati asüng (Mongulbar) nungi tenzüker March 6, 2017 tashi NBSE-i acha-ayanga agiba HSLC & HSSLC tatidang tiptema agitsü atema mokdangba kübok maitdaktsütsü telemtetba agiogo.
HSLC & HSSLC tatidang agütsür kaketshirtem aser ano iba dak sendakba ketdangsertem senzüsenbongtsü atema public transport, bus, taxi, sumo aser nija garitem senzüdaktsütsü, ta parnokisa metetdaktsüogo.
Taküm Nagaland Board of School Education (NBSE) ajanga agiba tatidang agütsür kaketshir ajak agi parnok 55,190 lir.
Tatidangtemji Classes 11 aser 12 nung Arts, Science aser Commerce telemsatem nung agitsü aser asüng nungi tenzükbaji March 6, 2017 nü tembangtsü.
Class 11 nung kaketshir 17272 aser Class 12 nung kaketshir 15472 tashi lir aser parnoki centre 151 aser 54 nung tatidang agütsütsü.
Ano külen, High School Leaving Certificate, Class 10 tatidang agütsütsü atema kaketshir 22446 lir aser parnoki centre 76 nung tatidang agütsütsü. Class 10 pur tatidang ya February 27, 2017 nü tembangtsü.
Iba osangbeneri Nagaland Minister for School Education, Yitachu den jembidang, tatidangtemji renema aliba ama agitsü, ta ashi.
“Tatidang thinenba ajanga kaketshirtem tarutsü raksatsütsü, anungji lungkak aitertemi tatidang tiptema agitsü atema lenmang lapoktsütsü,” ta paisa mepishia metetdaktsü.
Kaketshirtem tatidang agütsütsü atema examination centre-i aotsü aser arutsü atema terenemba balaka karbo ali asü mali ta asüngdangdang, iba tebilemtsüji tsüraburtem aser public temi khuret bena yariteptsüla, ta Yitachu-i langzü.