Mokdangba liang-teli sorkari ULB election agitsü : CM

Kohima, January 29 (TYO) : Naga kin teloktemi Urban Local Bodies (ULBs) atema February 1 election anema mokdangba aser tanga lungkak aitba sentongtem ayongzüka agiba nung sorkari nenok anema mapa meinyaker, anungji nenoki iba nungi ajangzüktsü tememerang, ta Nagaland Chief Minister, T R Zeliang-i ashi.
“State sorkar shinga dena metoktepi, temzüng nung lateta aliba ama, tetsür nem shilem 33 lemzükja Municipal aser Town Councils election agitsü” ta Deobar nikongtsütsü State Banquet Hall nung osangbener senden nung TR Zeliang-i ashi.
Nagaland state nung kin Hoho temi Joint Coordination Committee (JCC) ta ser telok ka tenteta lir aser parnoki yashi nungi state ajunga nung mokdangba sentong ayongzüka lir. Tanü Deobar asüba agi mokdangba maliasü saka asüng nungi parnoki election anogo tashi maneni mokdangtsü ta metetdaktsüogo.
Kohima aser Mokokchung Municipal Council tem den Tuensang Town Council nung kin hohotemi nisung shinga nema tenüng magütsüdaktsüi nokdang aser iba jagi item district headquarter nungbo mokdangba sentongji yashi atema dang ayongzüka agiogo.
Ajisüaka, kin hohotemi pei pei district headquarters nung February 1 nü mokdangtsü akok.
Telok anaprong tsüngda tangatettep kati maruteti aliba ajanga Nagaland state nung tensa mejungi akümtsü akok ta arentaka bilemer.
Tanü nikongtsütsü Chief Minister, TR Zeliang-isa ashiba agi, Nagaland Municipal Act 2001 nung India Linük Temzüng nung Arrla 243T enoksemer temzüngi inyaktsü tuyuba ama sorkari election dak sendakba maparen tembanga inyaktsü.
Parliament nung Constitution (73rd Amendment) Bill 1992 (Panchayati Raj) aser Constitution (74th Amendment) Bill, 1992 benoka jembidang telok shingaia anema menokdak aser iba Act anaprong 1993 nungi amshitsü tenzük aser ibaji Nagaland state nunga amshitsü benok, ta paisa ashi.
“Naga nunger akhi inyakyim aser sobaliba nung tebur aser tetsür teinyaktsü indang tangatetba asenoki melentsüla aser tanü putu den apet inyaktsüla” ta Chief Minister-isa ashi.
“Iba dak sendakba onük atema ni Joint Coordination Committee (JCC) aser Civil Society tem den aiben ajurutepa sendentem amen aser public taginüba angateta ni State Election Commission dang election anema atatsü atema asüngdang, saka election maparen tenzükba sülen tom nung thinentsü mesüra anena atatsübaji temzüngi memelar ta telangzüba angu. Election magitetra, ibaji temzüng nung lateta aliba mapa ka meinyaktetba asütsü aser iba ajanga khuret tulu bener arutsütsü” ta TR Zeliang-isa osangbenertemi asüngdangba ka langzüdang ashi.
Anungji, Naga kin hohotemi mokdangtsü ayongzükaka mesüra mokdangba mali nunga state sorkari temzüng nung lateta aliba ama tetsür nem shilem 33 lemzükja Municipal aser Town Councils elections agitsü, ta paisa metetdaktsü.
Paisa, kin hohotem dang sorkar indang teinyaktsü angatettsü aser ozüng alema meinyaktsü mepishia metetdaktsü.
Candidate tenüng agienba:
Chief Minister-isa ashiba agi, yimtenren telok shingaia candidate ka nem party ticket tashiyim agi agüja election nung metoktepdaktsür. Ajisüaka, candidate temi ticket meshir aser iba sülen party temi ticket lemzüktsür.
Civil organisations (non-political parties)-i candidate tem amokmerena aser tashiyim mapa inyaka parnok tenüng meyipa agidaktsüba mesüra retirement shidi züludaktsübaji democratic society ka nung magizükba inyakyim ka lir, ta TR Zeliang-isa ashi.
Tenüng meyipa agitsü atema tatembangba anogoji January 17 nü liasü aser iba anogo sülen tenüng meyipa agiba mesüra retirement shiditem ka danga magizüktsü aser February 1 nü polling station tem nung vote agütsütsü atema EVMs nung candidate party symbol keter alemtsü, ta paisa shisem.
Asen loktiliba nung ozüng maliba tensa adoktsüsa mapa meinyakdaktsünür aser nisung kari Sorkari inyakba mapa nung temulung mesüi bilemra, pa/lai ozüng alema masü saka timi okadak ken o benoktsü akok, ta chief minister-isa ashi.
“Khristan state ka nung, asenoki Khristan tajung ka ama alitsü merangdi aser ibaji ajanga asen lima nung yimjung alitsü aser asenoki tatishitsü tajung yutsütsü” ta ta TR Zeliang-isa ayongzük.
Tesem kar nung mobile data service shibanger:
Iba osangbener senden nung Nagaland Chief Secretary, Pankaj Kumar dena liasü aser pa dang Nagaland nung mobile data services shibangtsü atema tebilemba lir asü ta osangbenertemi asüngdangdang, “Home Commissioner-i aniba committee-i district ajak nung tensa reprangdar” ta pai langzü.
State nung lendong ataloktsü ana nung aliba tesemtem nung mobile data services shibangtsü ta Pankaj Kumar-isa ashi.
Ajisüaka, osang kar ajanga ashiba agi, Kohima kübok Tseminyu Sub-division, Dimapur, Wokha, Kiphire, Zunheboto aser Longleng district tem nung taonung nungi mobile data service shibangtsü atema tetuyuba agütsüogo.
Tanü nikongtsütsü osangbener senden nung Municipal Affairs Department Parliamentary Secretary, R Tohanba den Commissioner Secretary Menukhol John, Advisor to CM & MLA Merentoshi Jamir, Additional Advocate General of Nagaland Kakheto Sema aser Legal Advisor to CM Kondandaraman nungertem aden.