Moko achirtem tepu kara tsüker

Berlin, September 15 (Agencies): Moko teti aser kanga achirtem tepu karakara tsüktsü tebilemtsü tulu lir kechiba süra moko achiba ajanga tepunü tashidaktem mimbanga ayur, ta bushisüngdang tasen ka ajanga nguetogo

Tebur moko achirtem, machir dang nungi 3.6 agi takaraba tepu tsüktsü aser tetsüra yamaji 2.5 agi tekaraba tsüktsü tebilemtsü lir, ta scientist temi ashi.

Iba bushisüngdang ya University of Birmingham aser German Institute of Human Nutrition nung aliba bushisüngdangertemi Germany nung mapang talangka nungi agia liasü.

“Tepu timba ka shizüka tsüker mesüra tepunü tashidak kar ajanga tsüker,” ta University of Birmingham nungi iba bushisüngdang nung lenir Thomas Dietrich-i ashi.

“Moko achiba ajanga tepu lunga aliba tepunü aser terettem nung tashidak adokdaktsür ta asenok ajaki meteta lir anungji aika rasaa meshiaka tepu kara tsükbaji ajaki tangatetdang,” ta Dietrich-i ashi.

Tepu lunga aliba tepunü aser terettem nung tashidak adokbaji tepunü nungi azü aluba ajanga meteta akümer ajisüaka mokok achiba ajanga azü alubaji mimbanga ayur. Anungji mokochir ka tepunüji kanga majung sür nung tashi ita lir amai angur.

Dietrich -isa, “Moko achiba ajanga yamai tepunü tashidak mimbanga ayuba ajanga tashidak kanga menurang puteter,” ta ashi.

“Osang tajung kaji mokok achiba toktsütetra item tebilemtsütem samatsü aser moko kenyongi mechidanger den meneptepa tepu nung tashi ita akümtsü lenmang lir,” ta pai ashi.

“Tepunü nung tashidak putetba aser tepu kara tsükba ajanga mokochir ka temang anema aliba jenjang meteta akümer,” ta German Institute of Human Nutrition nungi Kolade Oluwagbemigun-i ashi.

“Anungji moko achirtemi kodang ibaji angateta arudir tepokpok tashidak aser cancer agi matongdak moko atoktsü mulungtettsü,” ta Oluwagbemigun-i ashi.

Iba bushisüngdang nung nisung 23,376-i shilem agia liasü aser moko achirtem tepu kara tsükbaji taintem dang nungibo lanurtem dak timba puteta liasü.

Anungji moko ajema achirtem dang nungia tali achirtem timba tepu tekaraba tsüker, ta iba bushisüngdang ajanga putetogo.

Iba tongotetba ya ‘Dental Research’ kaket nung adoktsüogo.