Moko company anogo shia sen crore 350 takoksa angur

New Delhi, April 12 (Agencies): India nunger moko yangluba industry anogo shia sen crore 350 takoksa ajurur, kechiyong cigarette pongdang nung ‘health warning’ atema temepishiba atema telangzüba magütsüba ajanga cigarette yanglurtemi factory tem shibanger, ta Mongolbarnü  Assocham-i ashi.
Assocham-i Centre sorkar dang, “Moko chiyungtsütem nung ‘health warning’ noksatem atema latettsüba ajanga India tesem ajaklen moko industry nung inyaker nisung million 45 dak tema taküm amokmeren tia nung lir,” ta ashi.
Parnokisa, cigarette yanglurtemi factory shibangba ajanga shilem 90 tashi ozüng alema moko shibelener, aser ibaji ajanga ozüng alema health warning noksa maliba moko ayokba timba-timba akumer, ta ashi.
Moko nung saru tali agiba ajanga India nung ozüng kübok moko ayokba nungi cigarette industry-i yokzükbaji  shilem 11 dang lir.
Industry organization-isa, moko alu ayimertemi senotsü timtem ajuruba ajanga Andhra Pradesh, Karnataka aser Telangana ama moko jenti züsentetba state tem nung aluyimertem soseta asüba kanga bulur, ta ashi.
Union health ministry-i, moko chiyungtsütem taseptsü/pongdang shilem 85 nung health warning noksa alitsüla ta tuyua lir.