Moko sali chia sayuba

Moko chitepba nung tokteper amato India nung moko sapua achir state-tem rongnung Nagaland tanabuba jenjang angubaji asenok ajak asoshi kanga tekümdangtsü osang ka lir. Ano, tekümdangtsütem rongnung kanga kümdangtsüba kaji Nagaland nung tanur aika küm 8 asüdang nungi moko achi tenzüker. Iba tebilemtsü tenzükba mapaji bushidangra tsürabur aser taintemi chia sayuba agi tanurtemi parnok jilu ajizüka benshiba nungi yimya sübaba teimba asütsü. Tanur ka asoshi tangazüktsü aika lir aser itemji angashiba, anguba aser tangshiba mapatem amala nungi angazüker aser item rongnung tanur ka asoshi angazüktsü lenmang temelatibaji anguba ya lir. Aji oda, tanur kati par tsürabur mesüra tain kati temeim aser awashi metet mapa tajung inyaka ngura, ibaji angazüker aser tanurjia temeim aketba aser awashi metetba nisung ka akümer. Iba amaji tsürabur aser taintemi kechi chia aser jema ngudir, tanurtemia kasaji chiajemner. Aji oda, tsürabur kati tanurtem dang moko sali machitsü asoshi sayutsüngi o shipet ashitsüa akok saka pai chia sayura, tanurtem jagi tsürabur bang nungi parnok dang kechi ashir ta asüba nung masü saka parnok nük agi par tsüraburtemi kechia chia angur ta asüba lenmanglenang temulung tagütsüba agüja angazüktsü. Iba amaji tanü asen lima nung tanurtem mazüoktetba tebilemtsütem tenzükba deraji reprangdangra, tanurtemi tamajung kümnüba agi masü saka tsüraburtemi parnok nükdang tajung inyaka mesayuba agi asütsü. Tsüraburtem aikati pei chirtem nem moko sali mechidaktsüner saka tsüraburtem jagibo achir. Iba kasaji tsüraburtem aikati pei chirnurtem dang yi majemtsü ajungshir saka tsüraburjibo yi teraka mejemra chia mechiyongtetter. Iba ama tsüraburtemi peisasa pei mazüoktetba agi tanurtem aika taküm raksadaktsür. Ano, tsüraburtemi tanurtem tsüngdang benshiba mapa tamajungtibaji tanurtem moko sali alii dokani yoker. Yi jemertemia tanurtem yi kidangi yi alii yoker. Iba amaji tsürabur kari danga pei chirnurtem dang benshia lira, tanü anogo ya ibaji khen jungjunga bilemdangtsü mapang tajung amai agizükdaktsüner. Ibai tanurtem kisüng arüja alitsüba putu masü mesüra tanurtem dang sayutsüngi o tajung shir asenokbo mashimashi alitsüba mapang ka masü. Tanurtem taküm koba ama lidaktsüner, iba amaji tsüraburtema alitsüla. Tanurtem dangbo meranga züngang ta ajungshitsü saka tsüraburtembo kecha meinyak kazüa senzüa sayura, tanurtemi tsürabur bang nungi angashibaji masü saka parnok nük agi anguba tsürabur jilujiang angazüktsü. Tanü India nung moko achir state-tem rongnung tematiba jenjang tanabuba nung Nagaland nokdaka alibaji asenok asoshi konangbo masü. Iba jenjang nung jagi asenok pilatsü merangtsüla. Aji oda, Nagaland nung yimtsüng kati danga moko kenyongi mayokba aser machiba ” Smoke Free Village” asütsü nangzüktet nungbo koda jungla ta bilemer. Nagaland nung tangar yimtsüngjibo yutsür, Ao lima nung danga moko kenyongi mayokba aser machiba yim ka danga ali asübo, iba yimjibo alima nung kanga nüngtugu kümla aser par yimertem asoshi dang masü saka tangar asoshia tatishitsü tajung aketba tayongzükba mapa tuluka süla. Atangji, iba amaji inyaktsübaji tasak saka inyakdi serbo tangatetba aser temulungtetba dang nüngdaker. Aji oda, moko sali ayokertemia moko sali masü tagitarutsü oset aser chiyongtsü tapu balala ayoktsü aser moko achirtemia machi aremtsü. Moko sali mayok agibo tesensakba makümtsü aser moko sali machiba agibo temangang tajungba akümtsü aser senotsüa aika kümzüktsü. Atangji, moko ya mokozü adoka mesepba ya dang masü saka sali nung enoker achiba, tekapu nung menünger tebang nung mangümba aser tanü asüng packet tilala nung seper ayokba ajak ya moko lir. Item jagi asenok tepseter.  Iba tangatetba nung tsüraburtemi moko sali machitsüla aser tanurtem dang tebang o agi sayutsüngi o ashiba ama pei taküm mapa agi liteta sayutsüla.