Mokokchung 150

Taküm 2015 küm Mokokchung kümer küm 125 ajungba mong amonger, anungji 2040 kümji Mokokchung küm 150 tain akümba küm asütsü. Atangji, alima tashitemetet züina alima aientsü asoshibo küm 150 ji aika masü ano tanur dang ta ashitsüa akok. Ajisüaka, ano tanü ama tangar alima kintem alima shisatsü tasen-tasen bushiloka ita aser petinu nung tua alitsü aritepba putu ka nungbo küm 150 ji aika asütsü. Alima nung joko tzü mopong menenadoker tali majungba indang alima kintem telongjem senden nung kanga shisabolua jembir. Iba shisabolu jagi alima nung lenirtem mulung animesüngzüktettsüsa kümogo, kechiyong alima ajaklen tzü mopong shitak kümzüka ayutsü asoshi tsüka-ronga sentong tajung yanglua meinyakra, asen aliba lima ya tzü agi atsüngbangtsüa akok mesüra yipru mopong aser menoknok tesashi agi samatsütsüa akok. Iba ama putu mapang ka nung asenok Mokokchung town ya 2040 küm, küm 150 ajungdang komaka asütsü ta yimdangi arua shisalemsatepba mapang tenzüker. Alima nung teinyaktetba, teyanglutetba aser temelenshi ajak ya yimdangi arua bilemdangba nungi mapa küma inyaktetba, yanglutetba aser melenshibatem lir. Aji oda, asenoki asen lima ya küm 25 sülen tang dang nungi kanga agia tajungba küma yangerteta asen nükla nung ngura, iba amaji shitak ataloktsü. Temetet, 2040 kümbo Mokokchung town ya tang dang nungi tersü agi tuluba kümer alitsü. Tanüa Ungma aser Khensa nungi Chuchuyimpang yim tashibo Mokokchung town amai kümogo. Anungji, taruba küm 25 tashi nungbo item yimtsüngtemji adena oagi Mokokchung town akümtsüsa adoktsü. Idangjibo, yimti anepalutsü asoshi aginüyonga maginüyonga Municipal ketdangsüba kübok alitsüsa akümtsü. Asenok tenem nung alir asünungji kibong aika anarongdena talitsü ki yangluba dak alaka kima mali aser ano ki aika tonga gari moutetba timtem lir. Aji oda, ki metsütepba yanglur kishinentepa litepba ya akhi tsürabur yimkümba sobaliba lir. Akhidangbo, tsükchir tsübuba agi külemi kishi nentepba alitsüsa aküm aser tetsüng agidang jajatsü asünungji gari agi ki atongba matongba timtem kecha mali asü. Ajisüaka, tanü asüngbo kibong shia kima tesadem alitsüla aser ki shia gari tonga aotsü nüngdaker. Anungji, item nüngdak aser taginübatem agi town dang masü saka yimtsüngtema taruba küm 25 tsüngdangbo alinük tuluba agisema kümyonga aotsü. Item ajakji yimdangi arua bilemdangdang, asen lima tuluba aser tajungba renloka aotsü atema tamasa asenok dak tangatetba tajung alitsü kanga nüngdaker. Asenok Aor dak tangatetba aser jakla tajung ka alibaji tajung süra yakta agizüker aser aji tangar den lemsateper. Tetezü Ao kin ya pei ajungtsü kija bilemba kin masü saka tangar dena jungdaktsüba kin lir. Tangar mangsa aser tebok tazüng yutsür temulung animesüngzüktetba kiji Ao kin lir. Ibayongji, asenoki kechi tajung tangar dang nungi agizük, aji yakta dang tangar kintem nema agüja nüji kümdaktsü. Iba jagi tanübo Nagaland nung Ao kin dang Samanir kin ta ajar. Ajisüaka, iba naroküm nungji asenok anisüngzüka kazütsüba masü saka samanir kinji samanir ama teti kechisarina ajak nung tangar dang nungi tama tongtetba aser tuluba yaritetba kin  asütsüla. Aji oda, Ao kinji samanir kin liasü ta masü saka Ao kinji teti samanir kin lir ta jembitsüsa asenoki nüken belem aser timtem agia tangar anitetba mapa maneni inyaktsüla. Asenok dak tajung aika lir saka tangatetba temesü kar aliba agi tajung ajakji menentsür. Item tangatetba melenshitsü nüngdakba rongnung ‘ ni samanir’ ta asüküma bilema anizüngzükba aser pei yimer kijai yimti tuluka küma renloktsü amai bilemba tebilembatem asütsü. Asen anasa aliba Guwahati yimti ya Assamese nunger kijaibo tuluka mekümtetla aser Bengali nunger kijaibo Kolkata pateka ya mekümtetla. Atangji, bendanger mashi-mashi nungoka maitdaktsütsü saka Naga nungerbo asen den sadoksadoka litettsüsa asenoki litettsüla. Tangbo asenoki asen kima ajanga gari senzütsü asoshi ali süklep ka ta magütsüner aser magütsür saka 2040 kümji asen lima aser asen yimtia tangar yimti mesüka garia aser nisungsa sademsadema senzütsüsa yimkong ajungtsü asoshi inyakba mapatem  nungbo akok tashi mekorui, khen atemabo takoksa aser timtem arema, tenla agütsütsüsa tangatetba tajung alitsüla. Küm 25 aotsübaji tang tenzüker aser memetetika süitemtsü, anungji tang nungi Mokokchung 150 among tenzükdi !