Mokokchung aser Jorhat district DC Level senden amen

Mangkolemba nung Mokokchung district aser Jorhat district Deputy Commissioner Level Coordination senden nung adenertem külemi tangokba noksa ka angur.

Mokokchung, Chiteni/July 10 (TYO) : Tanü Mangkolemba nung Mokokchung district aser Jorhat district Deputy Commissioner Level Coordination senden ka menenogo aser iba senden nung tongtipang telemteba pezü agia liasü aser itemji yamai liasü.

Taoba mapang 2021 küm July 21 nü Chief Secretary Level Meeting nung mulungtepa lemtetba ama Ao Senden yimtsüng nung district anaprong nungi maparen balala talisa ki-ojen asüba maparen inyakbatem anenadoktsü aser tensa süngjema alitsü asoshi anatsüi inyaktsüla ta lemtet.

Mokokchung aser Jorhat Border Magistrates-i külemi anogo tenet (7) tsüngda nung Aokum yim lushi asadanga reprangtsü telemtetba agi.

Tensa süngjema alitsü district administration anaprong tsüngda teti tongtepratepa alitsü aser talisa Border Magistrates aser police officers-tem teti dang osang agitepa alitsüla ta lemtet aser tatemsa Nagaland nung tekülem agiba anogo Deobar dak alaka district ana tsüngda artsülen official border visits aser official maparen inyakba ajak nübur anatsüi metettsüsa sorkar anaprongi mulungtepba tim tetuyuba nung inyaktsüla ta lemtet.

Tanü iba sentong nung Mokokchung Deputy Commissioner Ajit Kumar ajanga tarur pela agizüka jembia sentong tenzük aser Mokokchung aser Jorhat SP anaprong ajanga tepela o jembi. Sentong nungsa Assam aser Nagaland  Border Magistrate anaprongi shilem agia jembi aser  Border Peace Coordination Committee (Assam-Nagaland) telok nungia shilem agia jembibaba den ADC Mangkolemba-i tepela o jembia sentong tembanga liasü.