Mokokchung Baptist Arogo nung Free Medical Camp agi

Dimapur, October 4 (TYO) : Mokokchung Baptist Arogo nung Women Department-i achaayanga Senior Citizen Sunday nüngtem Oct. 3, 2015 anogo yimtsüng nung teintet rogotem temang tendang aser sen 40,000 jenjang mozü angati agütsü.
Iba sentong ya Red Cross Society, Mokokchung ajanga ayongzük.
Dr. Sunep, Secretary, RCS Mkg. Dist.-i ashiba agi iba anogo tantsür-tambur ajak agi parnok 97 tashi temang repranga liasü, iba nungi Blood Sugar keta alir 25 aser Tebu majunger parnok 11 tashi ajiteta tapet mozü agüja liasü.
Iba sentong nung teyaritepertemji, Dr. Kilang Pongen, Dr. Akum Pongen, Dr. Narola Lkr. aser Dr. Ayim (Dental), Red Cross Society nung teyariteper den Primary Health Centre, Mkg. Village nungi I. Toshi Lkr. Pharmacist aser Mrs. Amenla, Nurse nungertem liasü.
Mrs. Lemtila Asso. Pastor-i sangdong ka nung, “iba ama rongsen tulu den nübu, mapang aser shisatsü agi teyari tulu agütsü nung kanga pelar aser Tsüngrem teyari aser temoatsü parnok madak maneni alitsü sarasademtsür” ta metetdaktsü.