Mokokchung DC-i jila nung NSTCB ATM Booth semzüktsü

Mokokchung, October 13 (TYO): Nagaland State Co-operative Bank (NSTCB), ya Nagaland sorkari sponser asüba aser senotsü agi yariba local Bank kija lir aser parnoki tanü Mokokchung jila nung ATM booth ka lapoktsüogo.
Dimapur aser Kohima na sülenbo NSTCB ATM booth aliba tasembuba jilaji Mokokchung kümogo.
Iba ATM booth ya parnok Branch Office anasa (Main Police Point) jila tiyong nung lir aser iba ATM ya October 13 nü Mokokchung Deputy Commissioner, Sushil Kumar Patel-i semzüktsü.
Iba sentong nung jembidang DC-i Mokokchung nüburtem ajangzüktsü atema NStCB-i ATM agütsüba asoshi tenüngsang agütsü.
Paisa, Mokokchung nung pa tenzükba mapang nung NStCB-i mapa tajung inyakogo aser iba ya nüburtem nem agütsüba ‘sempet’ ka lir, ta ashi.
District Level Consultative Committee, NStCB mendenbuba Sushil kumar Patel-isa, NStCB-i customer tem dang nungi tajemtiba agir, ajisüaka jila nüburtemi NStCB Branch Office indang ano junga memetetba ya tesasatsüka lir, ta ashi.
NStCB-i inyakbaji tenüngsang agütsütsü tetemsü ta shia pai, ano nüburtem tajungtiba nung tenzükdaktsüner, ta ajungshi.
NStCB Ltd, Mokokchung district Board of Director, Bendangnukshi Longkumer-ia, NStCB-i jila tongti tesem nung ATM booth amenokba atema pelaba lemsatepba den külemi jila nüburtem ajangzüktsü atema ano mapa tajung maneni inyakdaktsüner, ta ashi.
Managing Director NStCB, Imtilemba Longkumer leniba nung iba sentong agi aser NStCB, Mokokchung Branch Senior Brach Manager, Nungsang-i tepela anküp o jembia liasü.