Mokokchung DC-i Republic Day atema sangdonger

Dimapur, January 24 (TYO) : Tang aruya aliba Republic Day sentong dak sendakba nung Mokokchung Deputy Commissioner, Sushil Kumar Patel, IAS-i, Mokokchung nung sorkar mapa inyakertem ajak January 26, 2017 anepdang 8:00 ako nung Imkongmeren Sports Complex atongtsüla, tashi magartem dak disciplinary action agitsü, ta metetdaktsüogo.
District office tem nung tekolaktemi pei staff tem tenüng ajatsü aser iba dakji ajemdaker teinyaktsü tim inyaktsü asoshi tenüng ajaba osangji Mokokchung Deputy Commissioner office tongtsütsü ketdangsertem nem tetuyuba agütsüogo.
Iba den külemi ano village council züngsemtem den Ungma, Mokokchung, Chuchuyimpang yimtem aser Mokokchung jila nungi GBs union ajak, ward 18 nungi lenirtem aser jila nung aliba nüburtem ajak dang iba sentong nung arua adentsü, DC-i mepeshia metetdaktsür.