Mokokchung DC, Patel-i Tour de Hills 3 tetoktepba tenzüktsüogo

Mokokchung Deputy Commissioner, Sushil Kumar Patel IAS-i Mokokchung kübok Imkongmeren Sports Complex nung Tour de Hills 3 sentong tanü Bodbar nü tenzüktsüba noksa nung angur. (Mokokchung, November 04)

Dimapur, November 04 (TYO): Mokokchung Deputy Commissioner, Sushil Kumar Patel IAS-i Tour de Hills 3 & Jubilee Adventure Trial tetoktepba sentong Mokokchung kübok Imkongmeren Sports Complex nung tanü Bodbar nü tenzüktsüogo.
Mokokchung jila tenteter küm 125 abensaba nüngtem nung Adventure & Motor Sports Association, Mokokchung (AMAM) teloki Mokokchung district sorkar, MDSC aser DDACC nunger den tangatettep nung iba sentong ya ayonga lir.
“Mokokchung jila aienba shilem nung tan sentong ya otsüsütsüsa mera tajung ka agir lir. Nagaland nung dang masü saka Northeast ajunga nung tejenba aser tekaraba ainba jila rong nung densemba jila, Mokokchung küm 125 abensaba ya pelatepa amongtsüla,” ta Patel-i tanü sentong nung metetdaktsü.
“Tan sentong ayongba ajanga Mokokchung district ajunga nung Mokokchung jila küm 125 tain akümba benjungmong salem lemsateptsü lenmang tajung lapoktsüba den külemi, benjungmonga tali mera ketdaktsür aser iba yongji tayonger dang pelaba lemsateper,” ta pai shisem.