Mokokchung DCC pur Moatsü benjung amung

Mokokchung, May 2 (TYO): District Congress Committee Mokokchung pur Moatsü benjung den repsema sanen luden senden ka parnok office nung meraketa mungogo.
Sentong nung DCC tir, Watimongbai jembidang, taoba mapang Tsüngremi Ao kin kanga meima lenmang aisü nung maongka agüja mezüngpur südaktsü, saka tanübo benjungbentsü tapu balala munga Aor tashi temeteter aika tangar lar küma aoba angur, ta ashi.
BJP ya telok kar ajangzüktsü atema dang rangloker inyakba party ka ta ajaki meteta lir, saka Ao lima tesem aika nung BJP nem vote agütsür aser Impur lima tashi nung BJP nem vote agütsübaji tesüngmangtsüka lir, ta DCC tir-isa ashi. Naga nunger asoshi Congress ya tapet party ka lir, kechiaser Congress party-i dang India lima kin ajak den sakuku süa litetba secular party ka lir, ta paisa shisem.
Tanü Moatsü amungba mapang Aortem meputepi aliba putepshitsü aser akhi merena aliba ama Naga nunger anitsü asoshi lungjemer aotsü, paisa tayongzükba ka agütsü.
Iba sentong nung DCC Adviser Wb. Satemlila, NPCC Züngsem Wb. Asang Aier, DYC tir Sp. Rongsenshilu, DCC vice President Wb. Noktsüng, DCC General Secretary Wb. Aotemsü, DCC Kimen Wb. Iminükshi parnoki shilem balala agia liasü. Mahila-temi sobaliba ken tajung ka aten aser DCC Adviser Akangmongbai Moatsü amungba rateta ashi.
Iba sentong nung DCC kübok aliba ACCC 10 nungi ketdangpurtemi tawa agiba Lok Sabha election aser 26 Aonglenden Assembly Constituency bye-election indang osang agütsü. Sentong nung Mokokchung DCC kübok aliba lenla tabensa nungi tenzükertem arua shilem agia aden.