Mokokchung district ANSTA aser NSSFOF-i metetdaktsür

Dimapur, May 22 (TYO): All Nagaland School Teachers Association (ANSTA) aser Nagaland Secondary School Field Officers Forum (NSSFOF) külem senden ka April 26, 2016 nü CANSSEA Conference Hall nung amen.
Iba senden nung School Education Department kübok Elementary/Secondary aser Higher Secondary lemdangtsü indang onük benoka olemtepba sülen Nagaland sorkar nem iba onük atema mapang telatet ka agüja takhangba agütsütsü telemtetba agi, ta NSSFOF, Mkg President, Lima Aier aser ANSTA, Mkg President, L. Imkong Lkr nati külem sangdong ka nung metetdaktsü.
Anogo 20 tsüngda state sorkari takhangbatem atema mapa inyaktsü mapang lateta agütsü, saka mapang süiaka state sorkari mapa kecha meinyaktsü, aser ibaji ajanga Central ANSTA aser NSSFOF-i shilem lemsar state ajungalen longkak aitba sentongtem agitsü tayongzükba agütsüogo, ta kasa sangdong nungsa shia lir.
Iba dak sendakba nung ANSTA aser NSSFOF Mokokchung district rongdak senden ka May 21 nü amen aser iba senden nung Central ANSTA aser NSSFOF nati lemtetba sülen anidaktsü bangjem, ta Lima Aier aser L. Imkong Lkr nati külem sangdong nung shia lir.
Mokokchung district kübok Primary nungi Secondary tashi tesayurtem aser NSSFOF züngsem ajaki Central ANSTA aser NSSFOF nati longkak aittsü tuyuba ama inyaktsü metetdaktsür.
Ano, ANSTA Mokokchung district kübok sub-unit asem – Mokokchung, Changtongya aser Mangkolemba nung ketdangpurtem aser sanen luden züngsemtemi pei pei telongtet nung lungkak aitba sentong ketdangsüa agitsü mapa nungloktsür, ta NSSFOF, Mkg President aser ANSTA, Mkg President natisa metetdaktsü.
Lungkak aitba sentong agitsü tuyuba:
Phase I: Anogo asemnü (May 24-26, 2016 tashi) Mass Casual Leave agitsü.
Phase II: June 1, 2016 nungi takhangbatem mapa küma meinyak tashi Total Cease Work.