Mokokchung District Football Association küm 25 jungogo

Mokokchung, Sept 30 (TYO): Mokokchung District Football Association (MDFA) telok tenzüker küm 25 ajungba jubilee sentong ka “promoting excellence” omen nung ajemdaker yangi Mayangnokcha Govt. Higher Secondary School Auditorium nung akhümketa agiogo.
Iba sentong nung temenungratsüka taoba mapang MDFA tenzükertem den MDFA life member-tem aser telok balala nungi tejaokertem arua shilem tajung agia aden.
Tanü iba sentong nung “MDFA tarutsü küm 25 nükla nung” ta sür taoba MDFA tir Alemjongshi-i jembidang, Mokokchung district ya football asayaba nunga mezüngpur lir, kechiyong Dr. T Ao-i tongtetba jenjang, tang tashi Naga nunger shingaia tongteta mali. Anungji, Dr. T Ao ama libaliru tajung den tazüokba akaba asayar adokdaktsütsü nükla yur inyaktsü tayongzükba ka agütsü.
Tanü iba sentong nung MDFA mezüng tongti zülur tsürabur I. Sashi Pongeni MDFA küm 25 ajungba nüngtem adokba nüngo kaket ka den külemi taküm küm nungi amshitsüba MDFA Trophy (asayamung marok) tasen ka meraketa sayatsü.
Sentong nung Taoba MDFA tir Moakaba Aier, tang teinyakdak MDFA tir Apong Jamir, Mokokchung District Sports Council tenüng nung Mokokchung ADC & Administrator MMC W. Manpai Phom, MDFA Life Member Bendangyanger, MDFA tatong tir Dr. Tia Imchen, Jubilee Planning Committee tayonger N. Bendang Jamir parnoki shilem balala agia liasü. Sentong nung Noksang Pongen aser Yashirenla Jamir nati jubilee ken tajung ka tena tesentepertem saksalemdaktsü.