Mokokchung district level Kala Utsav tetoktepba agiogo

Kohima, Mongputeni/October 15 (TYO): The Mokokchung District Level Kala Utsav tetoktepba Changtongya nung October 15 nü agiogo.
Sentong nung Assistant Mission Director SMA Samagra Shiksha Nagaland, Kelhikha Kenye-i iba tetoktepba indang metetdakja liasü. Kenye-isa, 2015 küm MHRD Government of India-i Kala Utsav benokba nükjidong metetdaktsü, koba education nung art benoka linük nung sobaliba wazüka ayutsü atema lir, ta ashi.
Maneni pai kaketshirtem dang asen tetsü tebou-i benshia aruba ochishiba aser mapa meranga inyakba yimya bilemteta iba sülen anidaktsü ajungshiba den sobaliba sobutsü tebor tajung sobutsü ayongzük.
Paisa, district nungi National Level tashi Kala Utsav tetoktepba jenjang balala indang metetdaktsü aser kaketshirtem dang parnoki akokba tashi tajungtiba agi shilem agitsü ajungshi.
Iba sentong ya District Mission Authority Samagra Shiksha Mokokchung-i ayongzüka agiogo.
Iba tetoktepba ya Vocal music, dance, instrumental music aser painting tetoktepba ta jurila tetoktepba pezü küma lemsar agi.
Vocal music nung GHSS Tuli nungi Zululemla aser RC Chiten Jamir Memorial School Changtongya nungi Alemmeren nati tetsür aser tebur jenjang nung takok angu.
Instrumental music teotoktepba, Chiten Jamir Memorial School Changtongya nungi Temsupokla aser GHSS Tuli nungi Tsunren Walling nati kokogo.
Tsüngsang tetoktepba RC Chiten Jamir Memorial School nungi Moanenla aser kasa school nungi Anyangba nati koka liasü. Painting tetoktepba GHSS Tuli nungi Sentikumla Jamir aser GHSS Tuli nungisa Usepyanger nati kokogo.
Takokertem district tenüng nung state level tetoktepba nung October 29 nü shilem agitsü.