Mokokchung district nung Assam Rifles Check-gates agientsüla

Dimapur, January 22 (TYO) : Mokokchung district kübok tesem asem nung sepaitem aser talisa Assam Rifles-i garitem mita reprangba ajanga senzüsenbongertemi timtem kanga ajuruba osangtem onok dang sangoktsüogo aser iba asoshi süoki ia bilemer, ta Ao Senden, Watsü Mungdang aser Ao Kaketshir Mungdang külem sangdong ka nung metetdaktsü.
Tensa aser mapang apir paramilitary forces-i lenmang nung garitem mita reprangba atema mepelai bilemba kecha mali, ajisüaka public highways nung sepaitemi permanent gates yanglubaji tim masü, ta Ao Senden Tatong Tir, O. Shilu, Watsü Mungdang Tir, Moachila aser Ao Kaketshir Mungdang Tatong Tir, Akummeren Longchar nungeri Mokokchung DC dangi züluba shidi nung shia lir.
AR check gates nung jawan kati ajok ka amer garitem anendakja asüngdangyaba aser gari indang temetettsütem register ka nung züluokba inyakyimji kangasa majung aser talisa item gate nung tetsür sepaitem menoktaker aser iba jagi senzüsenbonger tetsürtemi timtem ajurur.
National Highway yanglutsü telatetba nung speed breakers dena meyanglutsü shia lir, saka AR-i lapokba gate tem nung totzü pongdangtem ayuba ajanga garitem junga mesüiteti timtem ajurur.
Loktiyimtenren linük ka nung paramilitary mesüra army-i Highways nung check gates yanglutsü aser lapoktsü atema ozüng yanglua mali. Anungji gate lapokbaji ozüng alema lapokba lir aser security check gates lapoktsüsa tensa ajurura, civil police-i lapoka acha-ayangtsüla.
Nagaland nung Armed Forces Special Powers Act (AFSPA) mesüra Disturbed Area Act (DAA) agüja aliba nung ajemdaker sepaitemi parnoki inyaknüba ama mapa meinyaktsüla. AFSPA aser DAA ozüngtemjji UN kübok telok aikati majung ta shiogo, anungji Assam Rifles-i Mokokchung district kübok tesem balala nung check gate tem lapoka aliba shibangtsüla. Tesüiba mapangtem nunga iba kasa onük aiben sangoktsüogo, anungji district administration nung tekolakba ama iba mapa takok ngua inyaktsü mepishir, ta Ao Senden, Watsü Mungdang aser Ao Kaketshir Mungdang-i Mokokchung DC dang shidi ajanga metetdaktsüogo.