Mokokchung district nung World Malaria Day mongogo

Mokokchung, Rongchii/April 25, 2019: Imkongmeren Sports complex, Mokokching District nung Brehostibarnü alima ajunga den liromedema World Malaria Day sentong ayongzüka agiba mapang, sentong nung adenertem tangokba noksa ka yangi angur. 

Mokokchung, Rongchii/April 25 (TYO): Mokokchung kübok Imkongmeren Sports Complex nung April 25, 2019 Breshotibarnü “Zero malaria starts with me” omen nung ajemdaker Chief medical office, Mokokchung-i World Malaria Day sentong ayongzükja liasü. Iba sentong nung school 3 aser nisung 400 shi aruagi dena liasü, ta DPMU sangdong ajanga metetdaktsü.
World Malaria Day sentong ya küm shia alima ajuga nung April 25nü monga arur aser iba sentong ayongzükba ya alima ajungai malaria azükotsü nükjidong nung agir.
Sentong tenzüka, Dr Tiasunep DVBO-i, iba anogo amongba indang tongtibang onüktem rasa ashi aser kasa mapang sentong nung adenertem dang Malaria tashidak ya nisung ka dak nungi kodaser prokshir aser merila arenba nokdangtsü asoshi libajen aser temeküttem merüka ayutsü atema tatsü agi rasa ashi.
Paisa, Government Health centres nung nüburtem atema malaria tashidak nokdangtsü, services aser mozütem angati agi agütsüba indang ashi. Maneni, iba sentong nung Chief Medical officer Dr. Chubala Aier arua adenba, iba den külemi tesayurtem, kaketshirtem aser staffs tem aruagi adenba atema pelaba metetdakja liasü.
Iba sentong nungsa, Imsutemjen Higher secondary school nungi kaketshir kati “Zero malaria Starts with me” onük nung ajemdaker o tatsüka jembi. Sentong nung mendenji Imkummongba DVBD Consultant liasü aser Associate pastor, Bendang Jamir-i sarasademtsü.
Sentong tembanga DVBO-i anir “Zero malaria starts with me” omen nung ajemdaker yimyim ayim.
Iba anogo nungsa Mokokchung district kübok block 4 nung World Malaria Day sentong ayongzüka mongogo, kong Changtongya nung nisung 210 aser school 4, Tuli nung school 2 den kaketshir 221 aser Mangkolemba nungi school 1 den kaketshir 167 agi shilem agia liasü. Block balala shia nungi MO’s leniba kübok sentong achaayanga liasü.