Mokokchung district tia

Mokokchung district ya British nungertemi kümtetba yimti ka lir. Iba mapangbo Ao lima ya Assam kübok Naga Hills District nung sub-division ka liasü. Iba kasa yimten jenjang nung 1889 küm nungi India yimten nüchiso ngur külena 1957 küm tashi ali aser iba sülen, tang Arunachal state ta ser aliba lima ya dena Naga Hills Tuensang Area (NHTA) ta alima tilaka longtet aser iba kübok Mokokchung ya district ka aküm. Iba mapang NHTA kübok Kohima, Tuensang aser Mokokchung district asem dang liasü. Iba kasa jenjang nung lia 1961 küm NHTA ta aliba tesem aser tenüng ya Nagaland ta melener Assam kübok liasüba nungi razüka state balaka aküm. Iba tashi nung Mokokchung district kübok tang aliba Zunheboto aser Wokha district ya dena liasü. Ajisüaka, Naga nungersa asüyonga kin aser oshi balaka asübayong 1973 küm Mokokchung district nungi razüka Zunheboto aser Wokha na district balaka aküm aser Mokokchung district ya Aor temeja alidak disitrict ka küma adok. Iba denji ano British nunger mapangsa parnok yimten yimsüsüba maparen melamelaa tongtepratepa achaayangtettsü atema Ao lima agi tzükong pongo küma lemsatsü. Item tzükongtemji Ongpangkong, Langpangkong, Asetkong, Changkikong aser Japukong liasü. Atangji, tangbo Tzürangkong dena Ao lima Mokokchung district kübok tzükong trok kümogo. Itemji bilemdangra, taoba lenirtemi Mokokchung yimtiba ser Mokokchung district akümba aser tzükong tenüng tapet balala jateta yimten aser loktiliba maparentem achayangtsü apitetbaji shisa aser nükla tulu liasü ta angatetter. Item tzükongtem dakji alaka tang tashi nung Mokokchung district kübok sub division asem Tuli, Mangkolemba aser Changtongya mesemteta lir. Item sub division asem rongnunga Tuli aser Mangkolemba nung Additional Deputy Commissioner kaka yuja lir aser Changtongya nung Sub Divisional Officer yuja lir. Item dakji alaka, tzükong apia ora, Ongpangkong nung Ongpangkong, Asetkong nung Kubolong, Langpangkong nung Chuchuyimlang, Changkikong nung Alongkima, Japukong nung Longchem aser Tzürangkong nung Merangmen nung Extra Assistant Commissioner kaka yuja lir. Item ajakji nübortem nüngdak nung timmedemdaktsüi anepalutsü asoshi ketdangsertem yutsütsü mesemtetba tesemtem lir. Iba denji ano nübortem asoshi terenlok mapatem tonga oagi jungjunga inyaktsü atema EAC alidak tesem ajak nungji Rural Development department kübok RD Block amenoka lir. Item dakji alaka ano Mokokchung district nung alirtem asoshi maongka tulutibaji assembly constituency ter nungi tatar ter shimteter yokba ya asütsü. Atangji, Mokokchung district dang masü saka Nagaland nung kümteta akaba district ajunga ya tanga state nung aliba district-tem den medemdangra nübo aser alinük tasazük agibo district balaka asütsü malanga ta ashitsüa akok, saka nübortem anepalutsü asoshibo district, sub-division, block aser constituency aika küma lemsabajisa tajungba aser tayongba asütsü. Atangji, division aser block aika küma lemsaba jagi government senbo talila endoktsü, ajisüaka alushi tilaba aser nübo ishinba asüba jagi ketdangsertemi melamelaa ayimjema anepalutettsü. Asenoki reprangdangra, asen lima nung akaba constituency shia nung voter masü nütsüng meyi semer-a majung alitsü. Atangji, MLA kati alinük tilaka nung nütsüng meyi semer shi reprangtsübaji mapa tasakbo masütsü. Ajisüaka, Mokokchung district kübok sub diviisions, assembly constituencies aser RD Block-tem nung akaba lenmang, kaketreju, mozü ki aser nübortem aluyimba aser rongsen bushiba maparentem jenjang reprangdangra, district-a masü ama, sub-division-a maka ama, RD Block-a lapoka mali ama aser constituency repranger-a shinga mali ama angur. Iba amaji nübortem nüngdak reprangtsür mali ama akümba agi balaka, tang aliba Mokokchung district ya ana kümner südi. Iba jagi tebilemdangtsü aser tagitsü onük tongtibang ka metetdaktsür. Atangji, district ana akümtsübaji junger, saka asen lima aser nübortem junga anepalutsübajibo district tilaba küma lemsaba agi masü saka lenirtem aser nübortem jakla, shisatsü aser tangatetba tajungba küma melenshiba agi dang ajungtsü.