Mokokchung DPDB nung COTPA 2003 lemsatep

Dimapur, September 7 (TYO) : September 7, 2016 nü DPDB senden nung Mokokchung District Planning and Development Board (DPDB) züngsemtem dang Cigarette and Other Tobacco Product (COTPA) 2003 indang temetettsütem lemsatep.
Iba senden ya ADC Planning conference hall nung amen aser DC & Mokokchung DPDB Vice Chairman Sushil Kumar Patel menden ser amen.
Senden nung Imkongliba Memorial District Hospital, Mokokchung nungi Dr. Moa-i Power Point presentation ka ajanga (COTPA) 2003 indang temetettsü aser maparen inyakba metetdaktsü. Pa ya District Level Coordination Committee nung Member Secretary aser COPTA atema District Nodal Officer lir.
Dr. Moa-i moko achiba ajanga takoksa bener arutsüba aser moko nokdangba indang onüktem lemsatep aser paisa DPDB züngsem ajak dang iba Act mapa küma inyakba nung yariteptsü mepishi.
Nagaland state nung moko achir kanga lir aser küm nung India nunger nisung lakh 8 nungi 9 tsüngda moko dak sendakba tashidaktem ajanga taküm samar. Tasür teimbaka arishi küm 30 nungi 69 tsüngdapurtem liasü, ta paisa metetdaktsü.
Sorkar nungi senotsü peria manguba ajanga Mokokchung district nung Act junga metenzükteter, ta Dr. Moa-isa ashi.
Senden nung DPDB züngsem ajak nem “No Smoking Area: Smoking here is an Offence” tezülubatem agütsü aser itemji pei pei office tem nung ayutsü ayongzük.
DC & Vice Chairman Mokokchung DPDB, Sushi Kumar Patel-ia züngsem ajak dang Act mapa küma tenzüktsü atema yariteptsü ayongzük.
Founder Director, Farm2 Food Foundation, Assam, Samir Bordolai-i North East nung aluyimertem ajungkettsü atema mapa inyaker aser DC & Vice Chairman-i pa jaoka senden nung pai Power point presentation ka sayu.
ATMA Mokokchung aser Farm2 Food Foundation, Assam tsüngda tesentaktep lia mapa inyakba ajanga Mokokchung district nung aluyimertem kanga ajangzüktsü imlar, ta Sushil Kumar-isa ashi.
Mokokchung DC-isa SDPO Mokokchung, Swarnambika pela agizük. Pa ya tawa tu Mokokchung nung mapa lemzüktsü.