Mokokchung DPDB senden Feb 12 nü menogo

Dimapur, Tsüklai/February 12 (TYO): Ita shia amenba Mokokchung District Planning and Development Board (DPDB) senden February 12 nü ADC, Planning Hall, Mokokchung nung menogo. Iba senden ya Deputy Commissioner aser DPDB Deputy Chairman Rajesh Soundarajan, IAS lenisüba kübok aka.
Senden nung mendenbubai züngsem ajak dang taruba election atema renema alitsü aser shilem tajung agiba den pei tata mapa tamakok maludaktsüi inyaktsü ayongzük. Paisa poll duty chart nung züngoksemba sülenbo shinga nema tatok magütsütsü ta metetdaktsü.
Senden nungsa Imkongmeren Sports Complex nung indoor Sports building yanglushitsüba indang sensaksema liasü aser DC-i iba onük ya tongtibangsa agitsü ta metetdaktsüa. Maneni jila nung gari senzü senpongba dak sendakba nung tebilemtsü aliba onük nung ajemdaker sensakasem aser board-i iba dak sendaka aliba Department den tongtepratepa tebilimtsü aliba tem bentettsü asoshi lemtet, ta DPRO Mokokchung sangdong ka ajanga metetdaktsü.