Mokokchung DPDB senden menogo

Dimapur, Metsüremi/March 08 (Agencies): Ita shia amenba Mokokchung District Planning and Development Board senden March 7, 2019 anogo Dobashi Court SDO Changtongya nung Advisor, Industry & Commerce and NIDC, Imnatiba mendenpuba sür menogo. Iba senden nung Minister PWD, Tongpang Ozukum-a arua dena liasü.
Mokokchung district kübok DPDB senden jila balala nung amenba nükjidong ya sorkar aser nüburtem tesendaktep lidaktsütsü mechi lir, ta Imnatiba-i iba senden nung ashi. Paisa taruba senden nungibo MLA tem timba arua adentsü ta ashi aser lanurtem nem mangoka agütsüba asoshi Nagaland Chief Minister dang pelaba shisemba den külemi sorkar ketdangsertem dang pei wadang nung sentong tajung benoka amshitsü ajungshia liasü.
Lenmangtem yanglushitsü aser anepalutsü asoshi tang mezüngbuba Department nem agütsü aser mapa takok ngua inyakba ngua temulung asür, ta PWD Minister Tongpang Ozukum-ia ashi aser ali kiburi Department dang nungi shilem kar danga meshira iba lenmang nung mekongshitsü aser ali kibur khuret asütsü, ta tekümdangtsü shisem.
Iba senden nung board-i “Community & Social, Welfare Society” Yajang Village upgrade asütsü agizük. Parnokisa Mokokchung jila nung aliba lenmangtem yanglushitsü aser anepalutsü agizük, koba E.E. PWD (R&B) Mokokchung ajanga benoka liasü.
Tang teinyakdak Civil Hospital Mokokchung aser DC office complex tajungba küma yanglushiba maparen ya tekeraba nung tembangtsü asoshi Board ajanga ketdangsertem dang mepeshia liasü. Iba senden nungsa Child Help Line logo printing asütsü aser Mokokchung district nung aliba office ajak nung sentsü ateptsü jembia liasü.