Mokokchung DPDB senden menogo

Dimapur, Tsüklai/February 25 (TYO): Ita shia amenba Mokokchung District Planning and Development Board densen February ita atema February 25 nü ADC (Planning) Conference Hall, Mokokchung nung menogo. Iba senden ya Vice Chairman & Deputy Commissioner, Mokokchung, Limawapang Jamir lenisüba kübok agi.
Taoba DPDB senden nung Medical department dang district health Sector nung tang nungdakba project tem indang metetdaktsütsü asoshi tuyuba ama Chief Medical Officer Mokokchung aser Medical Superintendent IMDH-i board nem Ultra Sound Machine, silent Generator nüngdakba den tzü agi anüngba aser Hospital kishi-i süiba lenmang tangaleni anintsü nüngdakba metetdaktsü.
Parnokisa district kübok PHC tem nung nübu agi anüngba metetdaktsü. Ungma yimtsüng nung PHC ki asütsü asoshi department-i benok. Board-i item onüktem ajak asadang aser iba dak sendaka aliba department den tongteprateptsü aser tangalen nungia lenmang bushitsü lemtet.
Senden nung board-i, Allied Departments nungi züngsemtem densema Aliba yimtsüng lushi nung Growth Centre ka ama Satier adopt asütsü asoshi asadangtsü atema committee ka tentettsü.
Maneni board-i Green Team Society, Tongdentsuyong Ward, Mokokchung aser Fazl Ali College Alumni Association, Mokokchung züngoksemtsü atema iba dak sendaka aliba ketdangsertem dang abentsü mulunga agizük.