Mokokchung DPDB senden menoko

Dimapur, Aami 05 (TYO): Mokokchung District Planning and Development Board (DPDB) ita shia agiba senden Aami/June 05, 2018 nü ADC Conference Hall nung ADC Mokokchung mendenpuba sür agi.
Iba senden tenzükba mapang Officers Club of Mokokchung (OCM) ajanga district nungi tawa sangdongba HSLC aser HSSLC tatidang nung temaba jenjang anurtem nem tenüngsang agütsü. Queen Mary Higher Secondary School nungi Sentilong Walling, HSLC topper aser HSSLC nung Abishek Anand (Rank 2) na nem OCM ajanga senpet sen den kulikaket agütsü.
Changtongya Hospital nung nübu aser ki-o-jen peria maliba aser Economic importance scheme kübok Mokokchung jila indang Ring Road yanglutsüba indang concept note iba senden nung jembi aser item agenda tem ketdangser dangi yok.
Tuli jila nung Multi-Disciplinary Indoor Stadium yanglutsü asoshi iba senden nung agizüka ayu aser Sangtemla Ward, Mokokchung nung Teyimla Welfare Society registration agitsü atema iba senden nung agizüka forward süogo.
Kasa senden nung ADC Mokokchung, W. Manpai Phon-i DC & AEO tenüng nung DPDB züngsemtem, Department balala aser kijai Nagaland Parliamentary Election tebur junga tempangba nung shilem tajung agiba aoshi pelaba lemsatep.