Mokokchung Inter Ward Football Tournament akatsü

Mokokchung, Metsüremi/March 22 (TYO): Youth Association Marepkong (YAM)-i mezüng Mokokchung Inter Ward Football Tournament ayongzüktsü ternemba lir.
“Towards Excellence” omen nung ajemdaker iba asayamung ya March 25 nungi tenzüka March 30, 2019 nü tashi Imkongmeren Sports Complex nung ayonga agitsü.
Iba asayamung nung team 15-i shilem agiba angutsü. Shilem agir team shia pei ward nungi asayatsü. Inter Ward Football Tournament nung shilem agitsü team temji:- Alempang ward, Arkong ward, Artang ward, Dilong ward, Kichutip ward, Kumlong ward, Lijaba Lijen ward, Majakong ward, Marepkong ward, Mongsenbai ward, Penli ward, Sangtemla ward, Sungkomen ward, Tongdentsüyong ward aser Yimyu ward alitsü.
Ward balala nung lanurtem tsüngda telongjem akangshidaktsütsü aser football asayatsü sempet tajung aliba lanurtem ajungketsütsü nükjidong nung iba asayamung ayongzüker. Iba sabang ajanga Mokokchung jila nung alir sensopur nem maongkatem agütsütsü, ajungketsütsü aser mangdang tuluba tongtettsü asoshi ajungshitsü teimla nung YAM-i iba asayamung ayonger.
Iba asayamung mapang team shia nung shilem agirtemji ward nung züngsem asütsüla aser team tenüng nungi tangartem aruagi shilem agitsü memelar.
Asayamung nung takok angur aser runner-up team nem senpet sen 50,000 aser 30,000 den külemi trophy agütsütsü renema lir. Iba dak alia, best goal keeper, highest scorer, best defender aser player of the tournament amala asayar kija nem sempet balala agütsütsü.
Iba asayamung dak sendakba osang tejangja metetnüra ‘Emokokchung’ app ajanga tongteratepang. Iba app ya google play store ajanga download sütettsü.