Mokokchung jila küm 125 ajungba benjung amungtsü

Dimapur, August 7 (TYO) : Mokokchung jila ya 1890 küm British yimsüsüba kübok administrative centre ka ama tenteter taküm agi küm 125 jungogo. Iba dak sendakba nung taküm küm tatemlen benjung ayongzüka amungtsü atema Mokokchung District Planning and Development Board (DPDB)-i telemtetba agiogo.
August 7, 2015 nü ADC (Planning) conference Hall nung DC aser DPDB Vice Chairman, Sushil Kumar Patel lenisüba kübok senden agidang District Administration kübok yariteptsü atema luden balala shim.
Iba senden nung MLA Merentoshi aden aser pai Mokokchung jila küm 125 ajungba benjungji balaka amungtsü atema tebilemba lemsatep.
Mokokchung jilaji state nung tourist temi sapuba tongti tesem ka kümdaktsütsü asoshi terenlok mapa inyaktsüla aser nübortemi dang mulungtetra, sorkar dak dang meimla mapa aika inyaktettsü, ta Merentoshi-isa ayongzük.
MLA-isa Mokokchung jila tajungba kümdaktsütsü atema DPDB züngsemtemi tebilembatem lemsateptsü ayongzük.
Paisa, Swachh Bharat Mission atema jembidang NGO, ward aser yimtsüng tajungtiba shimteta sempet agütsütsü junger ta shidang.
Tanü senden nungsa Independence Day sentong, Work Charged & Adhoc Employee verification report aser National Highway o lenmang tongtipangtem nung arem leptettsü onüktem benoka lemsatep.
District Programme Officer NSACS, Mokokchung-i Mokokchung district nung HIV indang osang den NSACS Mokokchung ajanga inyakba mapatem power point presentation ka ajanga metetdaktsü.
HIV tashidak belenshiba aser ozüng anema mozü achirtem kanga lir saka department-i iba tensa kanga junga tenük yokdar aser azüoktsü merangdar, ta CMO Mokokchung, Dr. Akaba-ia senden nung metetdaktsü.