Mokokchung jila “plastic free” kümdaktsütsü inyaksangshir

Dimapur, Aami/June 18 (TYO): Küm tatem tashi nungbo Mokokchung jila “plastic free” kümdaktsütsü nükjidong nung tanü Mokokchung municipality kübok All Wards Union Mokokchung tenüng nung kiyong 18 nungi züngsemtem, Swachh Bharat Mission Mokokchung District ambassadors aser Mokokchung Chamber of Commerce & Industry (MCCI) nungi züngsemtem tsüngda MMC Conference Hall nung senden ka mena onük ishika pangzünga yuogo.
Iba senden ya MMC Administrator aser ADC Mokokchung, W. Manpai Phom lenisüba kübok aka aser Nagaland Swachh Bharat Mission state brand ambassador in charge of Mokokchug, Supongmeren Jamir aser Mokokchung SBM mendenbuba MB Longkumer alakteta jaoker liasü.
Onük balala nung o lemtepba sülen sentepa aliba lenirtemi Mokokchung jila “plastic free” kümdaktsütsü asoshi onük kar pangzünga yuogo. Parnoki jila nung October 2, 2019 tashi nungbo khen amshiba plastic carry bags nokdangtsü aser September tashi nungbo tzü bottle liter 1 dak tekübok nokdangtsü asoshi pangjem. Kasa mapang nung state sorkari tuyuba ama 50 microns tekübok plastic bags tem mamshidaktsütsü aser aibelener dang senchi achitsü lemtet. MMC-i sentepa aliba lenirtem dang tanü lemtetba onüktem benoka inyaktsü asoshi asalendong yanglutsü atema nungloktsüba den nüburtem nem mapang shidak nung osang agütsütsü lemtet.
Maneni senden nung septic tank kilentzü nung mezüoker aliba nokdangtsü telemtetba agi.
Senden tetenzüki State Brand Ambassador in charge of Phek district Vizopal Chaya, shiba Honibarnü iba lima nungi pilaa ao, pa nem minute ka ola madoki akhüm tetushi agüja liasü. Kasa mapang nung SMB Mokokchung-isa asür kibong den asükhu lemsatepogo, ta SBM Mokokchung, Information Secretary, Limalenden Longkumer-i sangdong ka ajanga metetdaktsü.